തിരുവനന്തപുരം: സ്പൈനൽ മസ്കുലർ അട്രോഫി (എസ്എംഎ) ബാധിച്ച കുട്ടികൾക്ക് പരീക്ഷണാടിസ്ഥാനത്തിൽ ഉപയോഗിക്കുന്ന ക്ലിനിക്കൽ ട്രയൽ മരുന്ന് വിതരണം ചെയ്തതായി പരാതി. തിരുവനന്തപുരം മെഡിക്കൽ കോളേജിൽ നിന്ന് നാല് രോഗികൾക്ക് നൽകിയ ജനറിക് മരുന്നിന്റെ കുപ്പിയിലാണ് 'ക്ലിനിക്കൽ ട്രയൽ' എന്ന് രേഖപ്പെടുത്തിയിരുന്നതായി രക്ഷിതാക്കൾ കണ്ടെത്തിയത്.
എസ്എടി ആശുപത്രി വഴി 118 കുട്ടികൾക്കാണ് സൗജന്യമായി മരുന്ന് നൽകിവരുന്നത്. മുൻപ് നൽകിയിരുന്ന മരുന്നിന് ഉയർന്ന വിലയായതിനാൽ അതിന് പകരമായി പുതിയ ജനറിക് മരുന്ന് നൽകാൻ തീരുമാനിക്കുകയായിരുന്നുവെങ്കിലും, മതിയായ ക്ലിനിക്കൽ പരിശോധനകൾ പോലുമില്ലാതെയാണ് ഇത് വിതരണം ചെയ്തതെന്ന് രക്ഷിതാക്കൾ ആരോപിക്കുന്നു.
കുപ്പികളിൽ ഫിസിഷ്യൻ സാമ്പിൾ അല്ലെങ്കിൽ ക്ലിനിക്കൽ ട്രയൽ ആവശ്യങ്ങൾക്ക് മാത്രമുള്ളതെന്ന് വ്യക്തമായി എഴുതിയിട്ടുണ്ടെന്നും, അസുഖം ഭേദമായിവരുന്ന കുട്ടികളെ പരീക്ഷണ വസ്തുക്കളാക്കുകയാണെന്നും മാതാപിതാക്കൾ കുറ്റപ്പെടുത്തി. കുട്ടികൾക്ക് എന്തെങ്കിലും സംഭവിച്ചാൽ ആര് ഉത്തരവാദിത്തം പറയുമെന്നും അവർ ചോദിക്കുന്നു.
