തിരുവനന്തപുരം: കണ്ണൂരിലെ പ്രതിഷേധ സംഭവവുമായി ബന്ധപ്പെട്ട് മുൻ മന്ത്രി വീണാ ജോർജിനെതിരെ ഡിജിപിക്ക് പരാതി നൽകി കെഎസ്‌യു. കെഎസ്‌യു സംസ്ഥാന അധ്യക്ഷൻ അലോഷ്യസ് സേവ്യറാണ് ഡിജിപിക്ക് ഔദ്യോഗികമായി പരാതി സമർപ്പിച്ചത്. ഗൺമാൻ എസ്ഐടിക്ക് നൽകിയ മൊഴി പുറത്തുവന്ന പശ്ചാത്തലത്തിൽ വീണയ്ക്കെതിരെ വഞ്ചനാക്കുറ്റം ചുമത്തി കേസെടുക്കണമെന്നാണ് ആവശ്യം.
തനിക്കെതിരെ കെഎസ്‌യു പ്രവർത്തകർ മാരകായുധങ്ങളുമായി ശാരീരിക ആക്രമണം നടത്തിയെന്ന് വീണാ ജോർജ് വ്യാജമൊഴി നൽകുകയും, അതിനായി തന്റെ ഗൺമാനെ കള്ളമൊഴി നൽകാൻ നിർബന്ധിക്കുകയും ചെയ്തതായി പരാതിയിൽ വ്യക്തമാക്കുന്നു.
ഈ ആസൂത്രിത നീക്കത്തിലൂടെ വീണാ ജോർജ് നിയമവ്യവസ്ഥയെയും പൊതുസമൂഹത്തെയും ഗുരുതരമായി കബളിപ്പിച്ചുവെന്നും, ജനാധിപത്യ സംവിധാനത്തിൽ ജനങ്ങളോട് സത്യസന്ധത പുലർത്തേണ്ട പൊതുപ്രവർത്തകർ ഈ ഉത്തരവാദിത്തം ലംഘിച്ചുവെന്നും പരാതിയിൽ ചൂണ്ടിക്കാണിക്കുന്നു.
