ആലപ്പുഴ: ആലപ്പുഴ ജില്ലയിൽ എൽഡിഎഫും യുഡിഎഫും തമ്മിൽ യാതൊരു വ്യത്യാസവുമില്ലെന്നും സങ്കുചിത ചിന്തയോടെയാണ് ഇരുമുന്നണികളും പ്രവർത്തിക്കുന്നതെന്നും മുൻ മന്ത്രിയും എംഎൽഎയുമായ ജി. സുധാകരൻ. മാക്കേക്കടവ്-നേരെകടവ് പാലം സന്ദർശിച്ച ശേഷം മാധ്യമങ്ങളോട് സംസാരിക്കുകയായിരുന്നു അദ്ദേഹം. പെരുമ്പളം പാലം ഉദ്ഘാടന വേളയിലോ പുതിയ പാലം ഉദ്ഘാടനത്തിലോ എൽഡിഎഫോ യുഡിഎഫോ തനിക്ക് ഒരു ക്ഷണക്കത്ത് പോലും നൽകിയില്ലെന്നും അദ്ദേഹം കുറ്റപ്പെടുത്തി.
തന്റെ കാലത്താണ് പാലം നിർമ്മാണം ആരംഭിച്ചതെന്നും ഭൂരിഭാഗം പണികളും കഴിഞ്ഞ സർക്കാരിന്റെ കാലത്ത് പൂർത്തിയാക്കിയതാണെന്നും ജി. സുധാകരൻ വ്യക്തമാക്കി. എന്നാൽ താൻ മന്ത്രിയായിരിക്കെയാണ് നിർമ്മാണം തുടങ്ങിയെന്ന് പറയാൻ പോലും എൽഡിഎഫിന് സാധിക്കുന്നില്ലെന്നും, സ്വന്തം നേട്ടങ്ങൾ പോലും പറയാൻ കഴിയാത്തവിധം വ്യക്തിവൈരാഗ്യം മൂലം സിപിഐഎം രാഷ്ട്രീയ പാപ്പരത്വത്തിലേക്ക് കൂപ്പുകുത്തിയെന്നും അദ്ദേഹം രൂക്ഷമായി വിമർശിച്ചു. കഴിഞ്ഞ അഞ്ച് വർഷത്തിനിടെ ജില്ലയിൽ എടുത്തുപറയത്തക്ക പുതിയ പദ്ധതികൾ ഒന്നും ഉണ്ടായിട്ടില്ലെന്നും അദ്ദേഹം ചൂണ്ടിക്കാട്ടി.
രാഷ്ട്രീയ വ്യത്യാസമില്ലാതെ എല്ലാ എംഎൽഎമാർക്കും തുല്യമായി ഫണ്ട് അനുവദിച്ച മുൻകാല പൊതുമരാമത്ത് പ്രവർത്തനങ്ങളുടെ കൂടി ഫലമാണ് ഇപ്പോഴത്തെ സർക്കാരെന്നും അദ്ദേഹം ഓർമ്മിപ്പിച്ചു. ഫ്ലക്സുകളിൽ തന്റെ ചിത്രമില്ലെന്നും താൻ സ്വമേധയാ പാർട്ടി പ്രവർത്തനങ്ങളിൽ നിന്ന് മാറിനിന്നതാണെന്നും വ്യക്തമാക്കിയ അദ്ദേഹം, പാലം നിർമ്മാണത്തിൽ ഷാനിമോൾ ഉസ്മാന് പങ്കില്ലെന്നും തനിക്ക് അവരിൽ നിന്ന് ക്ഷണമുണ്ടാകുമെന്ന് കരുതിയിട്ടില്ലെന്നും കൂട്ടിച്ചേർത്തു.
