കോഴിക്കോട്: പുതിയ സർക്കാർ അധികാരത്തിൽ വന്നയുടൻ വഖഫ് ബോർഡ് പുനഃസംഘടിപ്പിച്ചു എന്ന ആരോപണം തെറ്റാണെന്നും കോടതി നിർദേശം പാലിക്കുക മാത്രമാണ് സർക്കാർ ചെയ്തതെന്നും വഖഫ് മന്ത്രി എൻ. ഷംസുദ്ദീൻ. കാലാവധി തീരുന്നതിന് മുൻപ് ഭരണസമിതി പിരിച്ചുവിട്ടതിനെതിരെ വിമർശനമുന്നയിച്ച പ്രതിപക്ഷ നേതാവ് പിണറായി വിജയന് മറുപടി നൽകുകയായിരുന്നു അദ്ദേഹം. നിലവിലെ വഖഫ് ബോർഡിനെതിരെയുള്ള ഹർജി കോടതി നിരുപാധികം തള്ളിയതായും മന്ത്രി വ്യക്തമാക്കി.
മുൻപ് നടന്ന വഖഫ് ബോർഡ് തെരഞ്ഞെടുപ്പിൽ പ്രശ്നങ്ങളുണ്ടെന്ന് ചൂണ്ടിക്കാട്ടിയ കോടതി, അത് പരിഹരിക്കാൻ നൽകിയ നിർദേശമാണ് സർക്കാർ നടപ്പാക്കിയതെന്ന് അദ്ദേഹം വിശദീകരിച്ചു.
കാന്തപുരം വിഭാഗത്തിന്റെ ആക്ഷേപങ്ങളെക്കുറിച്ചും മന്ത്രി പ്രതികരിച്ചു. എല്ലാവരെയും ഉൾക്കൊണ്ടുതന്നെ മുന്നോട്ടുപോകുമെന്നും കാറ്റഗറി അടിസ്ഥാനത്തിൽ നിയമനം നടത്തിയതിനാലാണ് ചില പരിമിതികൾ ഉണ്ടായതെന്നും അദ്ദേഹം പറഞ്ഞു. ഇനിവരുന്ന മറ്റ് ബോർഡ് നിയമനങ്ങളിൽ ഇത്തരം പരാതികൾ ഉണ്ടാകില്ലെന്നും എൻ. ഷംസുദ്ദീൻ കൂട്ടിച്ചേർത്തു.
