കൊച്ചി: നെടുമ്പാശ്ശേരി വാഹനാപകടക്കേസിലെ ഒന്നാം പ്രതി സുഹൈൽ സജീവ്, സുഹൃത്തുക്കളായ നിനവ്, ജോയൽ, അമീൻ എന്നിവർ സമർപ്പിച്ച ജാമ്യാപേക്ഷകൾ അങ്കമാലി മജിസ്ട്രേറ്റ് കോടതി തള്ളി. നാല് മണിക്കൂറോളം നീണ്ട വാദപ്രതിവാദങ്ങൾക്കൊടുവിൽ, പ്രതികൾക്കെതിരെ വ്യക്തമായ തെളിവുകളുണ്ടെന്ന പ്രോസിക്യൂഷൻ വാദം അംഗീകരിച്ചാണ് കോടതി ഉത്തരവ്.
പ്രതികൾക്കെതിരെ ചുമത്തിയ കുറ്റകരമായ നരഹത്യ നിലനിൽക്കില്ലെന്നും പ്രായക്കുറവ് പരിഗണിക്കണമെന്നും പ്രതിഭാഗം വാദിച്ചെങ്കിലും, 19 വയസ്സുള്ള പ്രതികൾ തങ്ങൾ ചെയ്ത കുറ്റത്തിന്റെ ഭവിഷ്യത്ത് തിരിച്ചറിയാൻ ബോധമുള്ളവരാണെന്ന് പ്രോസിക്യൂഷൻ ചൂണ്ടിക്കാട്ടി. കൂടാതെ, അനുവദനീയമായ പരിധിയായ 30 മില്ലിഗ്രാമിന് പകരം സുഹൈലിന്റെ ശരീരത്തിൽ 150 മില്ലിഗ്രാമിലധികം മദ്യം അടങ്ങിയിരുന്നതായി വ്യക്തമാക്കുന്ന ശാസ്ത്രീയ പരിശോധനാ ഫലവും പ്രോസിക്യൂഷൻ കോടതിയിൽ ഹാജരാക്കി. സുഹൈൽ കടുത്ത മദ്യലഹരിയിലായിരുന്നുവെന്ന സാക്ഷിമൊഴികൾ ശരിവെക്കുന്നതായിരുന്നു ഈ റിപ്പോർട്ട്.
അപകടം നടന്ന ദിവസം ഉച്ചയ്ക്ക് വൈറ്റിലയിലെ ബാറിൽ നിന്നാണ് സുഹൈലും രണ്ടാം പ്രതി നിനവും മദ്യപാനം തുടങ്ങിയതെന്ന് പൊലീസ് കണ്ടെത്തിയിരുന്നു. തുടർന്ന് വൈകുന്നേരം പാലാരിവട്ടത്തെ ബാറിലും നെടുമ്പാശ്ശേരിയിലെ ആഡംബര ഹോട്ടലിലും എത്തി പുലർച്ചെ വരെയും ഇരുവരും മദ്യപിച്ചിരുന്നതായി വ്യക്തമായതോടെ, പരമാവധി തെളിവുകൾ സമാഹരിച്ചാണ് പ്രതികൾക്ക് ജാമ്യം നിഷേധിക്കാനുള്ള നടപടികൾ പൊലീസ് സ്വീകരിച്ചത്.
