കണ്ണൂർ: ചൊക്ലി സ്വദേശിയായ പതിനേഴുകാരൻ ശിവസൂര്യയെ കാണാതായി 70 ദിവസം പിന്നിട്ട പശ്ചാത്തലത്തിൽ കേസ് ഏറ്റെടുത്ത ക്രൈംബ്രാഞ്ച് എഫ്‌ഐആർ രജിസ്റ്റർ ചെയ്ത് അന്വേഷണം തുടങ്ങി. കണ്ണൂർ യൂണിറ്റ് ഡിവൈഎസ്പി കെ. സനിൽകുമാറാണ് അന്വേഷണത്തിന് നേതൃത്വം നൽകുന്നത്. ചൊക്ലി പോലീസും പ്രത്യേക അന്വേഷണ സംഘവും (എസ്ഐടി) അന്വേഷിച്ചിട്ടും കുട്ടിയെ കണ്ടെത്താനാകാത്തതിനെ തുടർന്ന് ബന്ധുക്കളും ആക്ഷൻ കമ്മിറ്റിയും ആഭ്യന്തര മന്ത്രിയെ കണ്ട് ആവശ്യപ്പെട്ടതോടെയാണ് കേസ് ക്രൈംബ്രാഞ്ചിന് വിട്ടത്.
വീട്ടുകാർ മൊബൈൽ ഫോൺ പിടിച്ചുവെച്ചതിലുള്ള വിഷമത്തിൽ, ഇനി ദൈവത്തിൽ ലയിക്കുകയാണെന്നും കാശിയിലേക്ക് പോകുകയാണെന്നും കുറിപ്പെഴുതിവെച്ച് ഓഗസ്റ്റ് എട്ടിനാണ് പ്ലസ് ടു വിദ്യാർഥിയായ ശിവസൂര്യ വീടുവിട്ടിറങ്ങിയത്. മാസങ്ങൾ കഴിഞ്ഞിട്ടും കുട്ടിയെക്കുറിച്ച് സൂചനകളൊന്നും കണ്ടെത്താനായിട്ടില്ല.
മുൻപ് അന്വേഷണം നടത്തിയ പോലീസ് സംഘം പെരിങ്ങത്തൂർ, പാനൂർ, തലശ്ശേരി, വടകര, കോഴിക്കോട് എന്നിവിടങ്ങളിലെ റെയിൽവേ സ്റ്റേഷനുകളും സിസിടിവി ദൃശ്യങ്ങളും കേന്ദ്രീകരിച്ച് പരിശോധന വ്യാപിപ്പിച്ചിരുന്നു. കൂടാതെ വാരണാസി, രാമേശ്വരം എന്നീ തീർത്ഥാടന കേന്ദ്രങ്ങളിൽ തിരച്ചിൽ നടത്തിയിട്ടും കുട്ടിയെ കണ്ടെത്താനായിരുന്നില്ല.
