തിരുവനന്തപുരം: സംസ്ഥാനത്തെ രൂക്ഷമായ വൈദ്യുതി പ്രതിസന്ധിക്കും പവർകട്ടിനും വഴിവെച്ചത് നിലവിലെ യുഡിഎഫ് സർക്കാരിന്റെ പിടിപ്പുകേടും കെടുകാര്യസ്ഥതയുമാണെന്നും, കഴിഞ്ഞ ഭരണകൂടത്തിന്റെ ചുമലിൽ പഴിചാരി രക്ഷപ്പെടാനാണ് ഭരണപക്ഷം ശ്രമിക്കുന്നതെന്നും പ്രതിപക്ഷ നേതാവ് പിണറായി വിജയൻ. നിയമസഭയിൽ അടിയന്തര പ്രമേയ നോട്ടീസിലൂടെ വിഷയം ഉന്നയിച്ച അദ്ദേഹം, നുണകളെ മനോഹരമായി അവതരിപ്പിച്ച് യാഥാർത്ഥ്യമാണെന്ന് വരുത്തിതീർക്കാൻ ചിലർക്ക് പ്രത്യേക വൈഭവമുണ്ടെന്നും കുറ്റപ്പെടുത്തി. ജനങ്ങളെ ദുരിതത്തിലാക്കുന്ന ലോഡ് ഷെഡിംഗ് എപ്പോൾ അവസാനിക്കുമെന്നാണ് നാടൊട്ടുക്കും ചോദിക്കുന്നതെന്നും 95 ശതമാനം പവർകട്ട് ഉണ്ടായിരുന്ന പഴയ ഇരുണ്ട കാലത്തിലേക്ക് കേരളത്തെ തിരികെ കൊണ്ടുപോകുകയാണോ എന്നും അദ്ദേഹം ചോദിച്ചു.
ഉമ്മൻചാണ്ടി സർക്കാരിന്റെ കാലത്തെ വൈദ്യുതി കരാർ എൽഡിഎഫ് റദ്ദാക്കി എന്നത് ശുദ്ധ അസത്യമാണെന്ന് വ്യക്തമാക്കിയ പ്രതിപക്ഷ നേതാവ്, 2016-ൽ എൽഡിഎഫ് അധികാരത്തിലേറിയപ്പോൾ കരാർ റദ്ദാക്കുകയല്ല, അതിലെ അപാകതകൾ ചൂണ്ടിക്കാട്ടി വൈദ്യുതി വാങ്ങുകയാണ് ചെയ്തതെന്നും വ്യക്തമാക്കി. യുഡിഎഫ് നിയോഗിച്ച ടി.എൻ. മനോഹരൻ അധ്യക്ഷനായ വൈദ്യുതി റെഗുലേറ്ററി കമ്മീഷനാണ് യുഡിഎഫ് ഭരണകാലത്തുതന്നെ കരാറിന് അംഗീകാരം നിഷേധിച്ചതെന്നും മാനദണ്ഡങ്ങൾ പാലിക്കാതെ കരാറുണ്ടാക്കിയ യുഡിഎഫിന്റെ വീഴ്ചയാണ് കമ്മീഷന്റെ ഇടപെടലിന് ഇടയാക്കിയതെന്നും അദ്ദേഹം ചൂണ്ടിക്കാട്ടി. തുടർന്ന് കേന്ദ്ര-സംസ്ഥാന സർക്കാരുകളുടെ വ്യതിയാന അനുമതി (ഡീവിയേഷൻ) തേടണമെന്ന നിർദ്ദേശം വരികയും, 2015 മുതൽ കമ്മീഷൻ സ്വീകരിച്ച നിലപാടുകളുടെ തുടർച്ചയായി 2023-ൽ പുതിയ കമ്മീഷൻ കരാർ റദ്ദാക്കുകയുമായിരുന്നു.
കരാർ റദ്ദാക്കപ്പെട്ടപ്പോൾ അത് പുനഃസ്ഥാപിക്കാൻ എൽഡിഎഫ് സർക്കാർ നയപരമായ നിർദ്ദേശം നൽകുകയും കമ്മീഷൻ അത് അംഗീകരിക്കുകയും ചെയ്തെങ്കിലും ട്രൈബ്യൂണൽ കരാർ റദ്ദാക്കൽ ശരിവെക്കുകയാണുണ്ടായത്. ഇതിനെതിരെ അന്നുതന്നെ സർക്കാർ സുപ്രീം കോടതിയെ സമീപിച്ചുവെന്ന് ഓർമ്മിപ്പിച്ച പിണറായി വിജയൻ, കേസ് പരമോന്നത കോടതിയിൽ ഭംഗിയായി നടത്തണമെന്നും ആവശ്യപ്പെട്ടു. എൽഡിഎഫിന്റെ കാലത്തും കടുത്ത പ്രതിസന്ധികൾ ഉണ്ടായെങ്കിലും ഉയർന്ന നിരക്കിൽ വൈദ്യുതി വാങ്ങിപ്പോലും ഒരിക്കലും പവർകട്ട് ഏർപ്പെടുത്തിയിട്ടില്ലെന്നും, രാജ്യത്തെ വൈദ്യുതിയുടെ 60 ശതമാനവും നിയന്ത്രിക്കുന്ന കോർപ്പറേറ്റ് കുത്തകകളുടെ കടന്നുവരവും കോൺഗ്രസും ബിജെപിയും ഒരേപോലെ പിന്തുടരുന്ന നവ ഉദാരവൽക്കരണ നയങ്ങളുമാണ് ഇപ്പോഴത്തെ യഥാർത്ഥ പ്രതിസന്ധിക്ക് ആധാരമെന്നും അദ്ദേഹം സഭയിൽ ചൂണ്ടിക്കാട്ടി.
