തിരുവനന്തപുരം: അടുത്ത അധ്യയന വർഷം മുതൽ എൽഎൽബി പ്രവേശന പരീക്ഷ മലയാളത്തിലും ഇംഗ്ലീഷിലുമായി ദ്വിഭാഷാ രീതിയിൽ നടപ്പിലാക്കാൻ സംസ്ഥാന സർക്കാർ അനുമതി നൽകി. വിദ്യാർത്ഥികളുടെ ആവശ്യങ്ങളും സർക്കാരിന്റെ മാതൃഭാഷാ നയവും പരിഗണിച്ച്, മലയാളം ഐക്യവേദി സമർപ്പിച്ച നിവേദനത്തിന്റെ അടിസ്ഥാനത്തിലാണ് ചോദ്യങ്ങൾ മലയാളത്തിൽ കൂടി ലഭ്യമാക്കാൻ ഉന്നത വിദ്യാഭ്യാസ വകുപ്പ് മന്ത്രി റോജി എം. ജോൺ നിർദ്ദേശം നൽകിയത്.
പരീക്ഷയുടെ നിലവാരം നിലനിർത്തിക്കൊണ്ടുതന്നെ കൂടുതൽ വിദ്യാർത്ഥി സൗഹൃദമായ അന്തരീക്ഷം ഒരുക്കാനാണ് ഈ പരിഷ്കാരമെന്ന് മന്ത്രി റോജി എം. ജോൺ വ്യക്തമാക്കി.
ചോദ്യങ്ങളുടെ രഹസ്യസ്വഭാവം സംരക്ഷിക്കുന്നതിനും വിവർത്തനത്തിലെ കൃത്യത ഉറപ്പുവരുത്തുന്നതിനും നിയമവിദഗ്ധരുടെ പ്രത്യേക പാനൽ രൂപീകരിക്കും. വിവർത്തനത്തിൽ ആശയക്കുഴപ്പമോ അർത്ഥവ്യത്യാസമോ ഉണ്ടാകുന്ന പക്ഷം ഇംഗ്ലീഷ് ചോദ്യമായിരിക്കും അന്തിമമായി കണക്കാക്കുകയെന്ന നിബന്ധന പ്രവേശന പ്രോസ്പെക്ടസിൽ ഉൾപ്പെടുത്തും.
