കോട്ടയം: മന്ത്രി കെ.എം. ഷാജിയുടെയും മറ്റ് മന്ത്രിമാരുടെയും വിദേശയാത്രകളെക്കുറിച്ച് സമഗ്രമായ അന്വേഷണം നടത്തണമെന്ന് ബിജെപി നേതാവ് ഷോൺ ജോർജ് ആവശ്യപ്പെട്ടു. മന്ത്രിമാർ കൂട്ടത്തോടെ വിദേശത്തായതിനാൽ ബുധനാഴ്ചകളിലെ മന്ത്രിസഭായോഗം പല രാജ്യങ്ങളിലായി വിളിച്ചുചേർക്കേണ്ട സാഹചര്യമാണെന്നും അദ്ദേഹം പരിഹസിച്ചു.
സർക്കാർ അനുമതിയില്ലാതെ നടത്തുന്ന വിദേശയാത്രകൾ ഗുരുതരമായ പിഴവാണെന്നും മന്ത്രിമാരിൽ രണ്ടുപേർ മാത്രമാണ് മുൻകൂർ അനുമതിയോടെ വിദേശത്ത് പോയതെന്നാണ് വിവരം ലഭിച്ചിട്ടുള്ളതെന്നും ഷോൺ ജോർജ് പറഞ്ഞു. മന്ത്രിമാർ എങ്ങോട്ടാണ് പോയതെന്നും എന്തിനാണ് സന്ദർശനം നടത്തിയതെന്നും വ്യക്തമായി അന്വേഷിക്കണമെന്നും, ഇവരുടെ ഭാഗത്തുനിന്ന് നിരന്തരമായ സത്യപ്രതിജ്ഞാലംഘനങ്ങൾ ഉണ്ടായിട്ടും സർക്കാർ യാതൊരു നടപടിയും സ്വീകരിക്കുന്നില്ലെന്നും അദ്ദേഹം ആരോപിച്ചു.
കെ.എം. ഷാജിക്ക് പ്രത്യേകാനുമതികളുടെയൊന്നും ആവശ്യമില്ലെന്നും ആനുകൂല്യങ്ങളുള്ള മന്ത്രിയാണ് അദ്ദേഹമെന്നും ഷോൺ കുറ്റപ്പെടുത്തി. 'മതമാണ് പ്രശ്നം' എന്ന് പറഞ്ഞ മന്ത്രിയെ മടിയിലിരുത്തി മതേതരത്വം പറയുന്ന മുഖ്യമന്ത്രി, പൊതുജനങ്ങൾക്കിടയിൽ ഇത്തരം കാര്യങ്ങൾ എങ്ങനെ വിലയിരുത്തപ്പെടുന്നുവെന്ന് സ്വയം പരിശോധിക്കുന്നത് നന്നായിരിക്കുമെന്നും, വിഷയത്തിലെ തുടർനടപടികൾ പാർട്ടി ആലോചിച്ച് തീരുമാനിക്കുമെന്നും അദ്ദേഹം വ്യക്തമാക്കി.
