തിരുവനന്തപുരം: സംസ്ഥാനത്തെ വൈദ്യുതി പ്രതിസന്ധി പരിഹരിക്കുന്നതിൽ യുഡിഎഫ് സർക്കാർ പൂർണ്ണമായി പരാജയപ്പെട്ടുവെന്നും പവർകട്ട് എന്തെന്ന് അറിയാത്ത ജനങ്ങളെ അത് അനുഭവിപ്പിച്ചു പഠിപ്പിച്ചത് ഈ സർക്കാരാണെന്നും മുൻ മന്ത്രി ജി.ആർ. അനിൽ. സഭ നിർത്തിവെച്ച് വിഷയം ചർച്ച ചെയ്യണമെന്ന് ആവശ്യപ്പെട്ട് അടിയന്തര പ്രമേയത്തിന് നോട്ടീസ് നൽകിയ അദ്ദേഹം, യുഡിഎഫ് അധികാരത്തിലെത്തുമ്പോഴെല്ലാം പവർകട്ട് ഉണ്ടാകുന്നത് എങ്ങനെയെന്ന് ചോദിക്കുകയും നാല് മാസം മുമ്പ് വിവാഹിതരായവർക്ക് പോലും വീടുകളിൽ കഴിയാൻ പറ്റാത്ത സാഹചര്യമാണെന്ന് പരിഹസിക്കുകയും ചെയ്തു.
എന്നാൽ, മുൻ എൽഡിഎഫ് ഭരണകാലത്ത് വൈദ്യുതി നിയന്ത്രണം ഉണ്ടായിരുന്നില്ലെന്ന വാദം വസ്തുതാവിരുദ്ധമാണെന്ന് ചൂണ്ടിക്കാട്ടിയ വൈദ്യുതി മന്ത്രി സണ്ണി ജോസഫ്, കഴിഞ്ഞ അഞ്ച് വർഷത്തിനിടെ മാത്രം 2,214 തവണ ലോഡ് നിയന്ത്രണങ്ങൾ നടപ്പിലാക്കിയതിന്റെ തീയതികൾ സഭയിൽ നിരത്തി. എൽനിനോ പ്രതിഭാസവും മഴക്കുറവും മൂലം ഡാമുകളിലെ ജലശേഖരം പകുതിയായി കുറഞ്ഞതും, ഉപഭോഗത്തിലുണ്ടായ വൻ വർധനവുമാണ് പ്രതിസന്ധിക്ക് കാരണമെന്ന് മുൻ മന്ത്രി കൃഷ്ണൻകുട്ടിയുടെ ലേഖനത്തിൽ വ്യക്തമാക്കുന്നുണ്ടെന്നും, റദ്ദാക്കിയ 460 മെഗാവാട്ടിന്റെ കരാർ നിലനിന്നിരുന്നാലും ഈ അധിക ഉപഭോഗ വിടവ് തുടരുമായിരുന്നുവെന്ന അദ്ദേഹത്തിന്റെ വാക്കുകൾ എൽഡിഎഫിന്റെ കുറ്റസമ്മതമാണെന്നും മന്ത്രി പറഞ്ഞു.
ഉപയോഗിക്കുന്ന വൈദ്യുതിയുടെ പത്ത് ശതമാനം മാത്രമാണ് സംസ്ഥാനത്ത് നിലവിൽ ഉത്പാദിപ്പിക്കുന്നതെന്നും, മുൻ വർഷത്തെ അപേക്ഷിച്ച് ഇക്കഴിഞ്ഞ സെപ്റ്റംബറിൽ 1,200 മെഗാവാട്ടിന്റെ അധിക ആവശ്യകതയുണ്ടായതായും മന്ത്രി സഭയെ അറിയിച്ചു. പൊതുമഴയിൽ 27 ശതമാനവും ഇടുക്കിയിൽ 47 ശതമാനവും കുറവുണ്ടായതിനൊപ്പം, ഏഴ് വർഷം നേട്ടമുണ്ടാക്കിയ ശേഷമാണ് ഉമ്മൻചാണ്ടി സർക്കാരിന്റെ കാലത്തെ കരാർ റദ്ദാക്കിയതെന്നും അത് പുനഃസ്ഥാപിക്കാൻ ബോർഡ് പലവട്ടം ആവശ്യപ്പെട്ടിരുന്നുവെന്നും അദ്ദേഹം വ്യക്തമാക്കി; പ്രതിസന്ധി പരിഹരിക്കാൻ സർക്കാരിന്റെ ശ്രമങ്ങൾ തുടരുകയാണെന്നും ജനങ്ങളെപ്പോലെ പ്രതിപക്ഷവും ഇതിനോട് സഹകരിക്കണമെന്നും സണ്ണി ജോസഫ് അഭ്യർത്ഥിച്ചു.
