പാലക്കാട്: തനിക്കെതിരായ ആരോപണങ്ങൾ മാധ്യമങ്ങൾക്ക് മുന്നിൽ വെച്ച് പിൻവലിച്ചില്ലെങ്കിൽ മാനനഷ്ടക്കേസ് നൽകുമെന്ന് പറഞ്ഞ് വിശ്വഹിന്ദു പരിഷത്ത് നേതാവ് ശശികല ഭീഷണിപ്പെടുത്തിയതായി നെടുമ്പാശ്ശേരി വാഹനാപകടത്തിൽ മരിച്ച ഗോപികയുടെ കുടുംബം വെളിപ്പെടുത്തി. ഗോപികയുടെ പിതൃസഹോദരൻ എം.ആർ. അനിൽ കുമാറാണ് ശശികലയ്ക്കെതിരെ ഗുരുതര പരാതിയുമായി രംഗത്തെത്തിയത്.
അപകടത്തിൽ മരിച്ച പെൺകുട്ടികളെ ശശികല ഉൾപ്പെടെയുള്ള രാഷ്ട്രീയ നേതാക്കൾ അപമാനിച്ചതിനെതിരെ കുടുംബം നേരത്തെ പരസ്യമായി പ്രതികരിച്ചിരുന്നു. ഇത്തരത്തിലുള്ള ഭീഷണികൾക്ക് പകരം, മരിച്ച കുട്ടിയോടും അവരുടെ കുടുംബത്തോടും ആദ്യം മര്യാദ പാലിക്കാൻ ശശികല പഠിക്കണമെന്ന് അനിൽ കുമാർ ആവശ്യപ്പെട്ടു.
ഫേസ്ബുക്ക് കുറിപ്പിന്റെ പൂർണരൂപം
കെ പി ശശികല എന്നെ വിളിച്ച് മാനനഷ്ടത്തിന് കേസ് കൊടുക്കും എന്ന് ഭീഷണിപ്പെടുത്തിയിട്ടുണ്ട്. അവര്‍ക്കെതിരെ പത്ര സമ്മേളനത്തില്‍ ഞാന്‍ ആരോപണം ഉന്നയിച്ചു എന്നാണ് പറയുന്നത്. ആരോപണം ഉന്നയിച്ചിട്ടുണ്ട്. അത് അവരുടെ പേരില്‍ സോഷ്യല്‍ മീഡിയയില്‍ വ്യാപകമായി പ്രചരിക്കുന്ന സ്‌ക്രീന്‍ ഷോട്ടുകളുടെ അടിസ്ഥാനത്തിലാണ്.
അത് വ്യാജമാണെങ്കില്‍ അത്തരം പ്രചരണത്തിനെതിരെ ആദ്യം അതവസാനിപ്പിക്കാനായി അവര്‍ ഡി.ജി.പിക്ക് പരാതി കൊടുക്കട്ടെ. പ്രസ്താവന നിഷേധിച്ച് പരസ്യമായി പ്രതികരിക്കട്ടെ. അതിന് പകരം സന്തപ്ത കുടുംബത്തിനെതിരെ മാനനഷ്ട കേസ് എന്ന ഉമ്മാക്കി കാണിച്ച് തറ രാഷ്ട്രീയ കുതന്ത്രം ഇറക്കി പേടിപ്പിക്കണ്ട. അത്തരം പേടിയുള്ള കുടുംബമൊന്നുമല്ല എന്റേത്. ചെയ്യേണ്ട കാര്യം താങ്കള്‍ ആദ്യം ചെയ്ത് കാണിക്കണം.
മരിച്ച കുട്ടിയോടും കുടുംബത്തോടും മര്യാദ പാലിക്കാന്‍ ആദ്യം പഠിക്കണം. എന്നിട്ട് മാനനഷ്ടവുമായി ഇറങ്ങുന്നതാണ് മനുഷ്യത്വം. അത് ചെയ്ത് കഴിഞ്ഞിട്ട് താങ്കള്‍ വക്കീലിനേയും കൂട്ടി കോടതിയിലേക്ക് പോകുന്നതല്ലേ നല്ലത്? ചെയ്യാത്ത കാര്യത്തിന്റെ പേരില്‍ താങ്കളെ കുറ്റപ്പെടുത്തിയിട്ടുണ്ടെങ്കില്‍ അക്കാര്യം തീര്‍ച്ചയായും പിന്‍വലിക്കും. പക്ഷേ, താങ്കളുടെ പേരില്‍ പ്രചരിക്കുന്ന പോസ്റ്റുകള്‍ പിന്‍വലിക്കാന്‍ താങ്കള്‍ ആദ്യം ഡി.ജി.പിക്ക് പരാതി കൊടുക്ക്. എന്നിട്ട് ഭീഷണിയുമായി വന്നാ പോരേ?
