തിരുവനന്തപുരം: സിഎംആർഎൽ-എക്സാലോജിക് സാമ്പത്തിക ഇടപാടിൽ വിജിലൻസ് എഫ്ഐആർ രജിസ്റ്റർ ചെയ്യണമെന്ന ഹൈക്കോടതി ഉത്തരവിനെതിരെ സംസ്ഥാന സർക്കാർ അപ്പീൽ നൽകണമായിരുന്നുവെന്ന് സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. കേസിൽ യാതൊരുവിധ തെളിവുകളുമില്ലെന്നും തെറ്റായ കീഴ്വഴക്കം സൃഷ്ടിക്കുന്ന ഈ നീക്കത്തിനെതിരെ അപ്പീൽ പോകാതിരുന്നത് ഇന്ന് കോടതി തന്നെ ചൂണ്ടിക്കാണിച്ച സാഹചര്യത്തിൽ, വിഷയത്തെ രാഷ്ട്രീയമായും നിയമപരമായും നേരിടുമെന്നും അദ്ദേഹം വ്യക്തമാക്കി.
കേന്ദ്ര ഏജൻസികളുടെ കേസെടുക്കാനുള്ള നിർദ്ദേശങ്ങൾ തമിഴ്നാടും പഞ്ചാബും തള്ളിക്കളഞ്ഞപ്പോൾ, കേരളത്തിൽ പ്രാഥമിക അന്വേഷണത്തിന് തീരുമാനിക്കുകയാണ് ഉണ്ടായതെന്ന് എം.വി. ഗോവിന്ദൻ കുറ്റപ്പെടുത്തി. ബിജെപിയുടെ താൽപ്പര്യങ്ങൾ നടപ്പിലാകുന്ന സാഹചര്യമാണിതെന്നും, ഇത് കോൺഗ്രസിന്റെ നയമാണോയെന്നും ഈ നിലപാടാണോ വി.ഡി. സതീശൻ നടപ്പിലാക്കുന്നതെന്നും വ്യക്തമാക്കണമെന്ന് അദ്ദേഹം ആവശ്യപ്പെട്ടു.
കേന്ദ്ര ഏജൻസികളുടെ ഇടപെടലുകൾക്കെതിരെ സംസ്ഥാനത്തെ രണ്ട് കേന്ദ്രങ്ങളിൽ സെമിനാർ സംഘടിപ്പിക്കുമെന്നും അദ്ദേഹം കൂട്ടിച്ചേർത്തു.
