കൊച്ചി: നെടുമ്പാശ്ശേരി വാഹനാപകടക്കേസിലെ പ്രതി സുഹൈലിനെതിരെ സെക്ഷൻ 304 അടക്കമുള്ള അതീവ ഗുരുതരമായ വകുപ്പുകൾ ചുമത്തിയിട്ടുണ്ടെന്നും പ്രതിയെ പോലീസ് സംരക്ഷിക്കുന്നുവെന്ന ആരോപണം അടിസ്ഥാനരഹിതമാണെന്നും ഡിജിപി റവാഡ ചന്ദ്രശേഖർ വ്യക്തമാക്കി. വിഷയത്തിൽ എന്തെങ്കിലും ആരോപണങ്ങളുണ്ടെങ്കിൽ വീണ്ടും പരിശോധിക്കാമെന്നും എഡിജിപി നേരിട്ട് കേസിൽ പ്രത്യേക ശ്രദ്ധ ചെലുത്തുന്നുണ്ടെന്നും അദ്ദേഹം പറഞ്ഞു.

പ്രതി മൂന്ന് ബാറുകളിൽ കയറി മദ്യപിച്ചിരുന്നതായി കണ്ടെത്തിയിട്ടും എഫ്ഐആറിൽ 'മദ്യം' എന്നൊരു വാക്ക് പോലും ഉൾപ്പെടുത്തിയിട്ടില്ലെന്നും പ്രതിയുടെ പേരിന് പകരം 'അൺനോൺ' (തിരിച്ചറിഞ്ഞിട്ടില്ല) എന്നാണ് രേഖപ്പെടുത്തിയതെന്നും കാണിച്ച് പോലീസിനെതിരെ വ്യാപക വിമർശനം ഉയർന്നിരുന്നു. കാറിന്റെ നമ്പർ മാത്രം വെച്ചാണ് കേസ് രജിസ്റ്റർ ചെയ്തതെന്നും, പ്രതിയുടെ പ്രവർത്തി മൂലം എന്ന് രേഖപ്പെടുത്തിയതല്ലാതെ മദ്യപിച്ച് വാഹനമോടിച്ച വിവരം എഫ്ഐആറിൽ ഇല്ലെന്നുമുള്ള ആരോപണങ്ങൾക്കിടെയാണ് ഡിജിപിയുടെ വിശദീകരണം.

മജിസ്‌ട്രേറ്റിന് മുന്നിൽ ഹാജരാക്കിയ പ്രതിയെ സാധാരണ ജയിലിലേക്ക് അയക്കുന്നതിന് പകരം ബോർസ്റ്റൽ ഹോമിലേക്ക് മാറ്റിയതും നേരത്തെ വലിയ തോതിലുള്ള വിവാദങ്ങൾക്ക് വഴിവെച്ചിരുന്നു.