പാലക്കാട്: നെടുമ്പാശ്ശേരി മിനി കൂപ്പർ വാഹനാപകടത്തിൽ മരിച്ച പാലക്കാട് കരിമ്പ സ്വദേശിനി ഗോപികയുടെ കുടുംബത്തിന് നീതി നിഷേധിക്കാൻ ഉന്നതതലത്തിൽ ഇടപെടലുകൾ നടക്കുന്നതായി കുടുംബം ആരോപിച്ചു. മൂന്ന് ജീവനുകൾ നഷ്ടപ്പെട്ട ഇത്രയും ഗൗരവമേറിയ സംഭവത്തിൽ പ്രതിയെ ജുവനൈൽ ഹോമിലേക്ക് മാറ്റിയത് കേസ് ഒതുക്കിത്തീർക്കാനാണെന്നും പോലീസിന് മേൽ ഉന്നത സമ്മർദ്ദമുണ്ടെന്നും പിതാവ് പ്രദീപ് കുമാർ കുറ്റപ്പെടുത്തി.
പ്രതിയുടെ പിതാവ് രണ്ട് മന്ത്രിമാരുള്ള ആലപ്പുഴ സ്വദേശിയാണെന്നും അവരുടെ സ്വാധീനം ഉപയോഗിച്ച് അട്ടിമറി നടക്കുമോയെന്ന് ഭയപ്പെടുന്നതായും കുടുംബം പ്രതികരിച്ചു. മൃതദേഹം തുന്നിക്കെട്ടിയ ശേഷം മുകളിൽ നിന്നുള്ള നിർദ്ദേശപ്രകാരമെന്ന പേരിൽ വീണ്ടും രക്തസാമ്പിൾ ശേഖരിച്ചത് ദുരൂഹമാണെന്ന് അവർ ചൂണ്ടിക്കാട്ടി. തങ്ങൾ ഓട്ടോറിക്ഷ ഓടിച്ചാണ് ഉപജീവനം നടത്തുന്നതെന്നും മകൾ പാർട്ട് ടൈം ജോലി ചെയ്താണ് ജീവിച്ചിരുന്നതെന്നും വ്യക്തമാക്കിയ കുടുംബം, പ്രതിയുടെ സ്വാധീനത്തിൽ സോഷ്യൽ മീഡിയ വഴി അപവാദ പ്രചാരണം നടത്തുകയാണെന്നും വ്യക്തമാക്കി.
പഠനത്തിനും ജോലിക്കും ശേഷം കിട്ടുന്ന സമയത്താണ് കുട്ടികൾ പുറത്തുപോകുന്നതെന്നും മാതാപിതാക്കളെ അറിയിച്ചിട്ടാണ് പോയതെന്നും കുടുംബം വിശദീകരിച്ചു. 'മുസ്ലിം യുവാവിനൊപ്പം ഹിന്ദു പെൺകുട്ടികൾ എന്തിന് പോയി' എന്ന് ചോദിച്ച് ശശികല ഉൾപ്പെടെയുള്ളവർ സോഷ്യൽ മീഡിയയിൽ വൃത്തികേടുകൾ പ്രചരിപ്പിക്കുകയാണെന്നും മാനുഷിക മര്യാദ കാട്ടണമെന്നും അവർ ആവശ്യപ്പെട്ടു. അടുത്ത ആഴ്ച വീട്ടിലേക്ക് വരാമെന്ന് പറഞ്ഞാണ് മകൾ മടങ്ങിയതെന്നും പ്രതി അല്പം ശ്രദ്ധിച്ചിരുന്നെങ്കിൽ ഈ ദുരന്തം ഒഴിവാക്കാമായിരുന്നുവെന്നും അമ്മ സജിത പറഞ്ഞു.
