തിരുവനന്തപുരം: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാർ മുൻപ് കേരളത്തിൽ നടത്തിയ അഴിമതികളെക്കുറിച്ചുള്ള പരാതി വിജിലൻസിന് കൈമാറിയെന്നും ശക്തമായ അന്വേഷണം പുരോഗമിക്കുകയാണെന്നും രമേശ് ചെന്നിത്തല അറിയിച്ചു. പഴയകാല ഫയലുകൾ വിശദമായി പരിശോധിച്ചുവരികയാണെന്നും ഇതിന് പിന്നാലെ തുടർനടപടികൾ സ്വീകരിക്കുമെന്നും അദ്ദേഹം വ്യക്തമാക്കി.
രാജ്യത്ത് നിലവിൽ ഏകാധിപത്യമാണ് നടമാടുന്നതെന്നും ജനാധിപത്യം അട്ടിമറിക്കപ്പെടുകയാണെന്നും ചെന്നിത്തല കുറ്റപ്പെടുത്തി. ഒരു പൗരന്റെ ഏറ്റവും പ്രധാനപ്പെട്ട വോട്ടവകാശം രാജ്യത്തിന്റെ വിവിധ ഭാഗങ്ങളിൽ കവർന്നെടുക്കുമ്പോഴും തെരഞ്ഞെടുപ്പ് കമ്മീഷൻ പരാതികളിൽ നടപടിയെടുക്കുന്നില്ലെന്നും ഇതിനെല്ലാം നേതൃത്വം നൽകിയ ഗ്യാനേഷ് കുമാർ ഉടനടി രാജി വെക്കണമെന്നും അദ്ദേഹം ആവശ്യപ്പെട്ടു. ഗ്യാനേഷ് കുമാറിനെപ്പോലൊരാളെ കണ്ടെത്തിയതിന് പ്രധാനമന്ത്രി നരേന്ദ്ര മോദിയെ അഭിനന്ദിക്കണമെന്നും അദ്ദേഹം പരിഹസിച്ചു.
ഇന്ത്യൻ ജനാധിപത്യം കാത്തുസൂക്ഷിക്കാൻ രാഹുൽ ഗാന്ധിയുടെ നേതൃത്വത്തിൽ നടക്കുന്ന ഈ പോരാട്ടത്തെ രണ്ടാം സ്വാതന്ത്ര്യ സമരമായാണ് ജനങ്ങൾ സ്വീകരിച്ചിരിക്കുന്നതെന്നും ചെന്നിത്തല കൂട്ടിച്ചേർത്തു.
