തിരുവനന്തപുരം: രാജ്യത്ത് സങ്കൽപ്പിക്കാൻ പോലുമാകാത്ത വിധത്തിലുള്ള ജനാധിപത്യവിരുദ്ധ നടപടികളാണ് നടക്കുന്നതെന്നും ദേശീയ തലസ്ഥാനം പൂർണ്ണമായും ഒരു പോലീസ് സ്റ്റേറ്റായി മാറിയെന്നും പിണറായി വിജയൻ. സഞ്ചാരസ്വാതന്ത്ര്യം ഉറപ്പാക്കണമെന്നും പ്രതിഷേധങ്ങളെ തടയരുതെന്നും അമ്പതിലധികം മെട്രോ സ്റ്റേഷനുകൾ അടച്ച പശ്ചാത്തലത്തിൽ സുപ്രീം കോടതി വ്യക്തമാക്കിയിട്ടും മോദി സർക്കാർ അതിന് വില കൽപ്പിച്ചില്ലെന്ന് അദ്ദേഹം വാർത്താസമ്മേളനത്തിൽ ആരോപിച്ചു. സിപിഐഎം ജനറൽ സെക്രട്ടറിയാണ് ഈ വിഷയം സുപ്രീം കോടതിയുടെ ശ്രദ്ധയിൽപ്പെടുത്തിയത്.
ജന്തർ മന്തറിലേക്ക് ആരും കടക്കരുതെന്ന് നരേന്ദ്ര മോദിയും അമിത് ഷായും തീരുമാനിച്ചതിന് പിന്നാലെ ഓരോരുത്തരെയായി പിടികൂടുകയായിരുന്നുവെന്ന് അദ്ദേഹം വ്യക്തമാക്കി. കൊടും ക്രിമിനലുകളെപ്പോലെയാണ് വാഹനത്തിലെ ലോക്കപ്പിലിട്ട് തന്നെയും മറ്റ് രണ്ട് പേരെയും ബൊലേറോ ജീപ്പിൽ മണിക്കൂറുകളോളം ചുറ്റിച്ചതെന്നും എങ്ങോട്ട് കൊണ്ടുപോകണമെന്ന് പോലീസിന് നിശ്ചയമില്ലായിരുന്നുവെന്നും അദ്ദേഹം വെളിപ്പെടുത്തി. ഒടുവിൽ എത്തിച്ച സ്റ്റേഷനിൽ ഭക്ഷണമില്ലാതിരുന്നതിനാൽ പോലീസുകാർക്കായി ഉണ്ടാക്കിയ ചപ്പാത്തിയുടെ ബാക്കിയാണ് തനിക്ക് കഴിക്കാൻ നൽകിയതെന്നും പിണറായി പറഞ്ഞു.
എസ്എഫ്ഐ പ്രവർത്തകരായ ജെയ്ക്കിനെയും ആദർശിനെയും അതിക്രൂരമായി പോലീസ് മർദ്ദിച്ചതായും, യുവാക്കളെ തല്ലുന്നത് തടയാനെത്തിയ ജോൺ ബ്രിട്ടാസ് എംപിയെ വാനിലിട്ട് ക്രൂരമായി മർദ്ദിച്ചതായും അദ്ദേഹം കുറ്റപ്പെടുത്തി. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന് അധികാരത്തിൽ തുടരാൻ അവകാശമില്ലെന്നും ചോദ്യം ചെയ്യാൻ പാടില്ലെന്ന സർക്കാർ നിലപാട് അംഗീകരിക്കാനാകില്ലെന്നും വ്യക്തമാക്കിയ അദ്ദേഹം, അറസ്റ്റുകൾ കൊണ്ട് ഗ്യാനേഷ് കുമാറിനെ സംരക്ഷിക്കാനാവില്ലെന്നും രാജ്യവ്യാപക പ്രക്ഷോഭത്തിന് എല്ലാ ജനാധിപത്യ വിശ്വാസികളും മുന്നിട്ടിറങ്ങണമെന്നും ആഹ്വാനം ചെയ്തു.
