തിരുവനന്തപുരം: സംസ്ഥാനത്തെ സർക്കാർ ഓഫീസുകളിലെ പ്രവൃത്തിദിനങ്ങൾ ആഴ്ചയിൽ അഞ്ചാക്കി ചുരുക്കുന്നതും ഞായറാഴ്ചയ്ക്ക് പുറമെ ശനിയാഴ്ച കൂടി അവധി നൽകുന്നതും ചർച്ച ചെയ്യാൻ സർവീസ് സംഘടനകളുടെ യോഗം ഒക്ടോബർ 17-ന് ചേരും. പൊതുഭരണ വകുപ്പ് പ്രിൻസിപ്പൽ സെക്രട്ടറി വിളിച്ചുചേർത്ത യോഗം അന്നേദിവസം രാവിലെ 11 മണിക്ക് ഓൺലൈനായാണ് നടക്കുക.
വിഷയത്തിൽ സർവീസ് സംഘടനകൾ തങ്ങളുടെ നിലപാടുകൾ ഈ മാസം 12-നകം അറിയിക്കണമെന്ന് നിർദ്ദേശിച്ചിട്ടുണ്ട്. ശനിയാഴ്ച അവധി നൽകുന്നതിനെ സംഘടനകൾ സ്വാഗതം ചെയ്യുന്നുണ്ടെങ്കിലും, ഇതിന് പകരമായി നിലവിലെ കാഷ്വൽ ലീവുകളും പൊതു അവധികളും വെട്ടിക്കുറയ്ക്കുന്നതിനെ ചില സംഘടനകൾ എതിർത്തു.
അതേസമയം, പ്രവൃത്തിദിനങ്ങൾ അഞ്ചാക്കി കുറയ്ക്കുന്നത് പൊതുജനങ്ങൾക്ക് സർക്കാരിൽ നിന്നുള്ള സേവനങ്ങൾ ലഭിക്കുന്ന ദിവസങ്ങളെ ബാധിക്കുമെന്ന വിമർശനവും ഉയരുന്നുണ്ട്. ആഴ്ചയിൽ രണ്ട് ദിവസത്തെ അവധി നടപ്പാക്കുമ്പോൾ മറ്റ് ലീവുകൾ കുറയ്ക്കാനുള്ള നീക്കത്തോട് സംഘടനകൾ പൂർണ്ണമായി യോജിക്കാൻ സാധ്യതയില്ലെന്നും വിലയിരുത്തപ്പെടുന്നു.
