പാലക്കാട്: ഡൽഹി പ്രക്ഷോഭവുമായി ബന്ധപ്പെട്ട് പാലക്കാട് റെയിൽവേ സ്റ്റേഷനിലേക്ക് നടത്തിയ മാർച്ചിനിടെ മദ്യപിച്ചെത്തിയ പോലീസ് ഉദ്യോഗസ്ഥൻ ഇടിവള ഉപയോഗിച്ച് മർദ്ദിക്കുകയും അസഭ്യം പറയുകയും ചെയ്തതായി എസ്എഫ്ഐ. എ ആർ ക്യാമ്പിലെ ഉദ്യോഗസ്ഥനാണ് ആക്രമണം നടത്തിയതെന്നും പരാതിപ്പെട്ടതോടെ ഇയാളെ സ്ഥലത്തുനിന്ന് ഉടനടി മാറ്റിയെന്നും എസ്എഫ്ഐ സംസ്ഥാന സെക്രട്ടേറിയറ്റ് അംഗം വിപിൻ ആരോപിച്ചു. 'ഓപ്പറേഷൻ തൂഫാൻ' ആദ്യം നടപ്പാക്കേണ്ടത് രമേശ് ചെന്നിത്തലയുടെ പോലീസ് സേനയിലാണെന്നും സംഘടന കുറ്റപ്പെടുത്തി.
സംഭവത്തിന് പിന്നാലെ ഉദ്യോഗസ്ഥനെതിരെ നടപടി ആവശ്യപ്പെട്ട് സിപിഐഎം, ഡിവൈഎഫ്ഐ നേതാക്കൾ രംഗത്തെത്തി. മുതിർന്ന നേതാവ് എൻ.എൻ. കൃഷ്ണദാസ് അടക്കമുള്ള സിപിഐഎം നേതാക്കൾ പാലക്കാട് ടൗൺ നോർത്ത് പോലീസ് സ്റ്റേഷനിലെത്തി പ്രതിഷേധിച്ചു.
മദ്യലഹരിയിൽ വിദ്യാർത്ഥികളെ മർദ്ദിച്ച പോലീസുകാരനെതിരെ കർശന നടപടി സ്വീകരിക്കണമെന്ന് ഡിവൈഎഫ്ഐയും സിപിഐഎമ്മും ആവശ്യപ്പെട്ടു.
