കൊച്ചി: നെടുമ്പാശ്ശേരിയിൽ മൂന്ന് പേരുടെ മരണത്തിനിടയാക്കിയ വാഹനാപകടത്തിന് കാരണക്കാരായവർക്കെതിരെ കർശനമായ നിയമനടപടികൾ സ്വീകരിച്ച് നീതി ഉറപ്പാക്കണമെന്ന് തൃക്കാക്കര എംഎൽഎ ഉമാ തോമസ്. ദുരന്തത്തിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് ആവശ്യമായ എല്ലാ പിന്തുണയും നൽകുമെന്നും നീതിക്കായി സാധ്യമായ എല്ലാ ഇടപെടലുകളും നടത്തുമെന്നും എംഎൽഎ വ്യക്തമാക്കി.
അമിതവേഗതയിലുള്ള വാഹനയാത്ര മൂന്ന് കുടുംബങ്ങളുടെ പ്രതീക്ഷകളെയും സ്വപ്നങ്ങളെയുമാണ് തകർത്തതെന്ന് അവർ ഫേസ്ബുക്കിൽ കുറിച്ചു.
പ്രിയപ്പെട്ടവരുടെ ഈ അപ്രതീക്ഷിത വിയോഗം കുടുംബാംഗങ്ങൾക്കും സുഹൃത്തുക്കൾക്കും സഹപാഠികൾക്കും സൃഷ്ടിച്ച വേദന വാക്കുകൾക്കതീതമാണെന്നും എംഎൽഎ പ്രതികരിച്ചു.
