തിരുവനന്തപുരം: കേരളത്തിലെ പരിസ്ഥിതി ലോല പ്രദേശങ്ങളുടെ (ഇഎസ്എ) കൃത്യമായ ഭൂപടം സർക്കാർ ഔദ്യോഗികമായി പുറത്തുവിട്ടു. പരിസ്ഥിതി ഡയറക്ടറേറ്റിന്റെ വെബ്‌സൈറ്റിലാണ് ഭൂപടം ലഭ്യമാക്കിയിരിക്കുന്നത്. സംസ്ഥാനത്തെ 33 വില്ലേജുകളിലായി വ്യാപിച്ചുകിടക്കുന്ന 8596.69 ചതുരശ്ര കിലോമീറ്റർ ഭൂമിയാണ് നിലവിൽ പരിസ്ഥിതി ലോല പട്ടികയിൽ ഉൾപ്പെട്ടിട്ടുള്ളത്.
പരിസ്ഥിതി ലോല മേഖലകൾ സംബന്ധിച്ച് ജനങ്ങൾക്കുണ്ടായിരുന്ന ആശങ്കകൾക്കും അവ്യക്തതകൾക്കും വ്യക്തത വരുത്തുന്നതാണ് ഈ വിവരങ്ങൾ. ഓരോ പ്രദേശത്തിന്റെയും പൂർണ്ണ വിവരങ്ങൾ വെബ്‌സൈറ്റിലെ മാപ്പിൽ വിശദമായി പരിശോധിക്കാം.
ജനവാസ മേഖലകളെയും കൃഷിയിടങ്ങളെയും പൂർണ്ണമായി ഒഴിവാക്കിയാണ് കേരളം കേന്ദ്ര സർക്കാരിന് മുൻപ് നിർദ്ദേശം സമർപ്പിച്ചിരുന്നത്. ഈ ഒഴിവാക്കലുകൾ പ്രതിഫലിപ്പിച്ചുകൊണ്ടുള്ള മാപ്പാണ് ഇപ്പോൾ വെബ്‌സൈറ്റിൽ പ്രസിദ്ധീകരിച്ചിരിക്കുന്നത്. സംസ്ഥാനം സമർപ്പിച്ച ശുപാർശകൾ കേന്ദ്ര സർക്കാർ അംഗീകരിക്കുമെന്ന പ്രതീക്ഷയിലാണ് കേരളം.
