കൊച്ചി: മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിന്റെ രാജി ആവശ്യപ്പെട്ട് ഡൽഹി ജന്തർ മന്തറിൽ നടക്കുന്ന സമാധാനപരമായ പ്രതിഷേധത്തെ അടിച്ചമർത്തുന്ന കേന്ദ്ര സർക്കാർ നടപടിക്കെതിരെ രഞ്ജിനി ഹരിദാസ്. അടിസ്ഥാന അവകാശങ്ങൾക്കായുള്ള പോരാട്ടത്തെ സർക്കാർ അടിച്ചമർത്തുകയാണെന്നും സമരം ചെയ്യുന്നവരെ തീവ്രവാദികളായാണ് കാണുന്നതെന്നും ഇൻസ്റ്റാഗ്രാമിൽ പങ്കുവെച്ച വീഡിയോയിലൂടെ അവർ വിമർശിച്ചു.
ഒരാളെ മാത്രം സംരക്ഷിക്കാനായി ഒരു ഭരണകൂടം പൂർണ്ണമായും നിലകൊള്ളുന്നത് പോക്രിത്തരമാണെന്ന് അവർ കുറ്റപ്പെടുത്തി. ഈ സാഹചര്യത്തിൽ ജനങ്ങൾ പരസ്പരം ഒന്നിച്ചുനിൽക്കണമെന്നും പൊതുജനങ്ങളുടെ മൗനത്തെയാണ് അധികാരികൾ ചൂഷണം ചെയ്യുന്നതെന്നും രഞ്ജിനി വ്യക്തമാക്കി.
ഡൽഹിയിലെ തെരുവുകളിൽ നിരത്തിയിരിക്കുന്ന സായുധ സേനയെ രാജ്യത്തെ സ്ത്രീസുരക്ഷയ്ക്കായി വിന്യസിച്ചിരുന്നെങ്കിൽ സ്ത്രീകൾക്കെതിരെയുള്ള പീഡനങ്ങളും അക്രമങ്ങളും ഒരു പരിധി വരെ തടയാമായിരുന്നുവെന്നും അവർ കൂട്ടിച്ചേർത്തു.
