തിരുവനന്തപുരം: നയപരമായ വിഷയങ്ങൾ പാർട്ടി നേതൃത്വവുമായി ചർച്ച ചെയ്യാറുണ്ടെങ്കിലും ദൈനംദിന ഭരണകാര്യങ്ങളിൽ പാർട്ടിയുമായി കൂടിയാലോചന നടത്തേണ്ട സാഹചര്യമില്ലെന്ന് വ്യക്തമാക്കി യുഡിഎഫ് കൺവീനർ അടൂർ പ്രകാശിന്റെ അഭിപ്രായങ്ങൾ തള്ളി മുഖ്യമന്ത്രി വി.ഡി. സതീശൻ. പിടിഐക്ക് നൽകിയ പ്രത്യേക അഭിമുഖത്തിലാണ് മുഖ്യമന്ത്രി തന്റെ നിലപാട് വ്യക്തമാക്കിയത്. തനിക്ക് പാർട്ടിയിൽ നിന്ന് പൂർണ്ണ പിന്തുണ ലഭിക്കുന്നുണ്ടെന്നും അദ്ദേഹം കൂട്ടിച്ചേർത്തു.
പാർട്ടിയിലുള്ള ആർക്കും തന്നെ വിമർശിക്കാനുള്ള സ്വാതന്ത്ര്യമുണ്ടെന്നും, പുതിയതായി എത്തിയ യുവാക്കൾക്കും ആ അവകാശമുണ്ടെന്നും മുഖ്യമന്ത്രി പറഞ്ഞു. വിമർശനങ്ങളിൽ പറയുന്നതാണ് ശരിയെങ്കിൽ അത് തിരുത്തുമെന്നും, തന്റെ ഭാഗത്താണ് ന്യായമെങ്കിൽ അവരെ കാര്യങ്ങൾ ബോധ്യപ്പെടുത്തുമെന്നും അദ്ദേഹം വ്യക്തമാക്കി.
കെ.സി. വേണുഗോപാലും രമേശ് ചെന്നിത്തലയും മുഖ്യമന്ത്രി സ്ഥാനത്തിന് പൂർണ്ണ യോഗ്യരാണെന്നും, എന്നാൽ ഹൈക്കമാൻഡ് എടുത്ത തീരുമാനത്തിന്റെ അടിസ്ഥാനത്തിലാണ് താൻ ഈ പദവിയിലെത്തിയതെന്നും സതീശൻ പറഞ്ഞു. ഇരുവരുമായും തനിക്ക് മികച്ച വ്യക്തിബന്ധമാണുള്ളത്. കെ.സി. വേണുഗോപാലുമൊത്ത് യാത്രകൾ ചെയ്യാറുണ്ടെന്നും അദ്ദേഹത്തിന്റെ കുടുംബവുമായും രാഹുൽ ഗാന്ധി, സോണിയ ഗാന്ധി എന്നിവരുമായും അടുത്ത ബന്ധം കാത്തുസൂക്ഷിക്കുന്നുണ്ടെന്നും അദ്ദേഹം ചൂണ്ടിക്കാട്ടി.
