കൊച്ചി: എറണാകുളം ജനറൽ ആശുപത്രിയിലെ ഓങ്കോളജി വിഭാഗം ഐസിയുവിലെ ശീതീകരണ സംവിധാനം (എസി) തകരാറിലായിട്ട് രണ്ടാഴ്ച പിന്നിട്ടതോടെ കടുത്ത ചൂടിൽ കാൻസർ രോഗികൾ ദുരിതത്തിൽ. സ്പെഷ്യാലിറ്റി കാൻസർ ബ്ലോക്കിന്റെ അഞ്ചാം നിലയിൽ പ്രവർത്തിക്കുന്ന 16 കിടക്കകളുള്ള ഈ ഐസിയുവിൽ കീമോതെറാപ്പി കഴിഞ്ഞവരുൾപ്പെടെ പ്രത്യേക പരിചരണം ആവശ്യമുള്ള അതീവ ഗുരുതരാവസ്ഥയിലുള്ള രോഗികളാണ് കഴിയുന്നത്. ചൂട് കാരണം രോഗികളും കൂട്ടിരിപ്പുകാരും കടുത്ത ബുദ്ധിമുട്ട് നേരിട്ടിട്ടും അധികൃതർ ശാശ്വത പരിഹാരം കാണുന്നില്ലെന്നാണ് ബന്ധുക്കളുടെ പരാതി.
കംപ്രസർ തകരാറിലായതാണ് എസി പ്രവർത്തനരഹിതമാകാൻ കാരണമെന്നും ചില അനുബന്ധ ഭാഗങ്ങൾ ലഭിക്കാത്തതാണ് അറ്റകുറ്റപ്പണി വൈകിപ്പിക്കുന്നതെന്നും ആശുപത്രി അധികൃതർ വിശദീകരിച്ചു. പുതിയ എസിക്ക് ഓർഡർ നൽകിയിട്ടുണ്ടെന്നും നിലവിലെ സാഹചര്യം നേരിടാൻ ഓരോ രോഗിക്കും പ്രത്യേകം ഫാനുകൾ സജ്ജീകരിച്ചിട്ടുണ്ടെന്നും അധികൃതർ വ്യക്തമാക്കുന്നു.
എന്നാൽ, കെട്ടിടത്തിന്റെ അഞ്ചാം നിലയിലെ കടുത്ത ചൂട് പ്രതിരോധിക്കാൻ ഫാനുകൾ ഒട്ടും പര്യാപ്തമല്ലെന്നും രോഗികളുടെ ആരോഗ്യസ്ഥിതി കണക്കിലെടുത്ത് അടിയന്തരമായി എസി പുനഃസ്ഥാപിക്കണമെന്നും രോഗികളുടെ കൂട്ടിരിപ്പുകാർ ആവശ്യപ്പെടുന്നു.
റിപ്പോർട്ടർ ചാനലാണ് വാർത്ത പുറത്തുവിട്ടത്
