പത്തനംതിട്ട: ബലാത്സംഗക്കേസ് പ്രതിയായ രാഹുൽ മാങ്കൂട്ടത്തിലിനെതിരെ സമൂഹമാധ്യമത്തിൽ വീഡിയോ പങ്കുവെച്ചതിന് വ്ലോഗർക്കെതിരെ പത്തനംതിട്ട അടൂർ പോലീസ് കേസെടുത്തു. ചിറയിൻകീഴ് സ്വദേശി അൽ റാഷിദിനെതിരെയാണ് ഭാരതീയ ന്യായ സംഹിതയിലെ 192, 356 (2), കേരള പോലീസ് ആക്ടിലെ 120 (ഒ) എന്നീ വകുപ്പുകൾ ചുമത്തി കേസെടുത്തത്. 'മാർബറോ' എന്ന ഇൻസ്റ്റഗ്രാം അക്കൗണ്ട് വഴിയായിരുന്നു ഇയാൾ പോസ്റ്റ് ചെയ്തത്.

ഇന്ന് രാവിലെ 10 മണിക്ക് അടൂർ പോലീസ് സ്റ്റേഷനിൽ ഹാജരാകാൻ അൽ റാഷിദിന് നിർദ്ദേശം നൽകിയിട്ടുണ്ട്. ഇതിനിടെ, പോലീസ് തന്റെ വസതിയിലെത്തി പരിശോധന നടത്തിയെന്ന ആരോപണത്തോടൊപ്പം ഉദ്യോഗസ്ഥർ എത്തിയതിന്റെ ദൃശ്യങ്ങളും അൽ റാഷിദ് പുറത്തുവിട്ടു.

സമൂഹമാധ്യമങ്ങളിൽ തന്നെ വിമർശിച്ചതുമായി ബന്ധപ്പെട്ട് രാഹുൽ മാങ്കൂട്ടത്തിൽ നൽകിയ പരാതികളിൽ 17 പേർക്കെതിരെ നടപടികൾ പുരോഗമിക്കുന്നതായാണ് വിവരം.