തിരുവനന്തപുരം: നഗരസഭയിലെ ഹാജർ പുസ്തകത്തിൽ വ്യാജ ഒപ്പിട്ടെന്ന പരാതി പൂർണ്ണമായി തള്ളി ജയിൽ മോചിതനായ ബിജെപി കൗൺസിലർ ആർ. സുഗതൻ രംഗത്ത്. ഹാജർ പട്ടികയിലെ ഒപ്പുകൾ തന്റേത് മാത്രമാണെന്നും, കോർപ്പറേഷൻ ഓഫീസിലെ ഏത് മുക്കിലും മൂലയിലുമുള്ള സിസിടിവി ക്യാമറാ ദൃശ്യങ്ങൾ പരിശോധിച്ച് ആർക്കും ഇക്കാര്യം ബോധ്യപ്പെടാമെന്നും അദ്ദേഹം വ്യക്തമാക്കി. ഏത് ഫൊറൻസിക് പരിശോധനയെയും സ്വാഗതം ചെയ്യുന്നതായും പോലീസ് അന്വേഷണത്തോട് പൂർണ്ണമായി സഹകരിക്കുമെന്നും അദ്ദേഹം അറിയിച്ചു.
തടവിൽ കഴിഞ്ഞ കാലയളവിൽ കൗൺസിൽ യോഗങ്ങളിൽ ഹാജരാകാതെ വ്യാജ ഒപ്പിട്ടുവെന്ന് ആരോപിച്ച് പ്രതിപക്ഷ കൗൺസിലർമാരായ ദീപക്കും ശബരിനാഥും സിറ്റി പോലീസ് കമ്മീഷണർക്ക് നൽകിയ പരാതി തീർത്തും അടിസ്ഥാനരഹിതമാണെന്ന് സുഗതൻ പറഞ്ഞു. കോടതി ഉത്തരവ് അനുകൂലമായതിനെ രാഷ്ട്രീയ സ്വാധീനമായി എതിരാളികൾ ചിത്രീകരിക്കാൻ സാധ്യതയുണ്ടെന്നും അദ്ദേഹം പരിഹസിച്ചു.
താൻ ഒളിവിലായിരുന്നുവെന്ന വാദവും അദ്ദേഹം നിഷേധിച്ചു. ഏപ്രിൽ മാസത്തിൽ വാട്ടർ അതോറിറ്റിക്ക് മുന്നിൽ നടന്ന സമരത്തിൽ പങ്കെടുത്തതിന്റെ ദൃശ്യങ്ങൾ മാധ്യമങ്ങൾ തന്നെ നൽകിയിട്ടുള്ളതാണെന്നും മെയ് മാസത്തിൽ മാത്രമാണ് മാറിനിന്നതെന്നും അദ്ദേഹം കൂട്ടിച്ചേർത്തു. കഴിഞ്ഞ നാല് മാസമായി പൊതുരംഗത്ത് സജീവമല്ലായിരുന്നെന്നും, എട്ട് വർഷമായി തുടരുന്ന ഒരു ജനകീയ സമരവുമായി ബന്ധപ്പെടുത്തിയാണ് തനിക്കെതിരെ കേസെടുത്തതെന്നും സുഗതൻ വ്യക്തമാക്കി.
