കൊച്ചി: കാലിക്കറ്റ് സർവകലാശാലാ പുരുഷ ഹോസ്റ്റലിലെ 'കണ്ണൂർ ബ്ലോക്ക്' വിവാദത്തിൽ വിശദീകരണവുമായി എസ്എഫ്ഐ സംസ്ഥാന സെക്രട്ടറി പി.എസ്. സഞ്ജീവ്. വിവിധ ദേശങ്ങളിൽ നിന്നെത്തി പഠിക്കുന്ന വിദ്യാർത്ഥികൾ തങ്ങളുടെ മുറികൾക്ക് ഇഷ്ടമുള്ള പേരുകളോ വ്യക്തികളുടെ പേരുകളോ നൽകുന്നത് തെറ്റായി വ്യാഖ്യാനിക്കുന്നത് അംഗീകരിക്കാനാകില്ലെന്ന് അദ്ദേഹം വ്യക്തമാക്കി. എസ്എഫ്ഐ ഉള്ളിടത്തെല്ലാം വിശ്വമാനവിക രാഷ്ട്രീയം പ്രതിഫലിക്കുമെന്നും അവിടെ കണ്ണൂരും ഫിദലും ചെഗുവേരയും പലസ്തീനും ഗ്രാംഷിയും ഭഗത് സിംഗും ഇഎംഎസും എകെജിയുമെല്ലാം ഇടംപിടിക്കുമെന്നും അദ്ദേഹം പറഞ്ഞു.
കണ്ണൂർ ബ്ലോക്കിന് പുറമെ ചൈന, വിയറ്റ്നാം, ക്യൂബ, നക്സൽബാരി, തെലങ്കാന, വയലാർ, തൃശ്ശിവപേരൂർ, മലപ്പുറം, പൊന്നാനി എന്നിങ്ങനെ ചരിത്രവും സമരവീര്യവും തുടിക്കുന്ന അനവധി പേരുകൾ വിദ്യാർത്ഥികൾ ഹോസ്റ്റലിൽ നൽകിയിട്ടുണ്ടെന്ന് സഞ്ജീവ് ചൂണ്ടിക്കാട്ടി. ഇത്തരം പേരുകൾ സ്വയം തിരഞ്ഞെടുക്കുന്നത് ചരിത്രത്തോടും നിലപാടുകളോടുമുള്ള ഐക്യദാർഢ്യത്തിന്റെ ഭാഗമായാണ്.
രാഷ്ട്രീയം പറഞ്ഞ് വിജയിക്കാനാകാതെ വരുമ്പോൾ എംഎസ്എഫും കെഎസ്‌യുവും ചേർന്ന് വിദ്യാർത്ഥികളെ അരാജകവാദികളെന്നും അക്രമികളെന്നും മുദ്രകുത്തുകയാണെന്ന് അദ്ദേഹം ആരോപിച്ചു. തങ്ങൾക്ക് വോട്ട് ചെയ്യാത്തവരെ രാജ്യദ്രോഹികളാക്കുന്ന സംഘപരിവാർ ശൈലിയാണ് യുഡിഎസ്എഫ് പയറ്റുന്നത്. ഹോസ്റ്റലിനെ 'രാവണൻകോട്ട' എന്ന് വിളിച്ച് രാഷ്ട്രീയ ധാരണയില്ലാതെ സംസാരിക്കുന്നവരെ വിദ്യാർത്ഥികൾ തള്ളിക്കളയുമെന്നും സഞ്ജീവ് കൂട്ടിച്ചേർത്തു.
