കൊച്ചി: കേരളത്തിൽ എയിംസ് (AIIMS) അനുവദിക്കുന്നതിന് നിലവിൽ മുൻഗണനയില്ലെന്ന് കേന്ദ്ര സർക്കാർ ഹൈക്കോടതിയെ അറിയിച്ചു. ആരോഗ്യരംഗത്ത് മികച്ച നിലവാരം പുലർത്തുന്നതിനാൽ കേരളത്തേക്കാൾ പിന്നാക്കം നിൽക്കുന്ന സംസ്ഥാനങ്ങൾക്കാണ് പ്രഥമ പരിഗണനയെന്നും മറ്റ് സംസ്ഥാനങ്ങളിൽ സ്ഥാപിച്ച ശേഷമേ കേരളത്തെ പരിഗണിക്കൂ എന്നും കേന്ദ്രം നിലപാട് വ്യക്തമാക്കി. കാസർഗോഡ് എയിംസ് ജനകീയ കൂട്ടായ്മ സമർപ്പിച്ച ഹർജിയിൽ മുൻപ് കോടതി ആവശ്യപ്പെട്ടതനുസരിച്ചാണ് കേന്ദ്രം ഈ വിശദീകരണം നൽകിയത്.

കേന്ദ്ര സർക്കാരിന്റെ ഈ നിലപാടിനെതിരെ ഹൈക്കോടതി രൂക്ഷവിമർശനം ഉന്നയിച്ചു. ആരോഗ്യരംഗത്ത് മുന്നിൽ നിൽക്കുന്നത് കേരളത്തിന് ഒരു അയോഗ്യതയാണോ എന്നും, അങ്ങനെയെങ്കിൽ ഡൽഹിയിൽ എങ്ങനെയാണ് എയിംസ് അനുവദിച്ചതെന്നും കോടതി ചോദിച്ചു.

ഉയർന്ന ജനസാന്ദ്രതയുള്ള സംസ്ഥാനമായതിനാൽ കേരളത്തിന് എയിംസ് അർഹതപ്പെട്ടതാണെന്ന് ഹൈക്കോടതി നിരീക്ഷിച്ചു. സാധാരണക്കാരായ എല്ലാവർക്കും മുൻനിര സ്വകാര്യ ആശുപത്രികളിലെ ചികിത്സാച്ചിലവ് താങ്ങാനാകില്ലെന്നും അതിനാൽ എയിംസ് കേരളത്തിന് അത്യന്താപേക്ഷിതമാണെന്നും കോടതി വ്യക്തമാക്കി.