തൃശ്ശൂർ: കള്ളപ്പണം വെളുപ്പിക്കൽ നിരോധന നിയമപ്രകാരം (പിഎംഎൽഎ) രജിസ്റ്റർ ചെയ്ത കേസുകളിൽ സംസ്ഥാനത്തെ വിവിധ സഹകരണ ബാങ്കുകൾ കേന്ദ്രീകരിച്ച് എൻഫോഴ്സ്മെന്റ് ഡയറക്ടറേറ്റിന്റെ (ഇഡി) വൻ പരിശോധന. സഹകരണ ബാങ്ക് ചരിത്രത്തിലെ തന്നെ ഏറ്റവും വലിയ റെയ്ഡായി വിലയിരുത്തപ്പെടുന്ന ഈ നടപടി, പോലീസ് രജിസ്റ്റർ ചെയ്ത കേസുകൾക്ക് പിന്നാലെ രണ്ട് വർഷം മുൻപ് (2024-ൽ) എടുത്ത ഇസിഐആറുകളുടെ അടിസ്ഥാനത്തിലാണ് പുരോഗമിക്കുന്നത്. പരിശോധനയിൽ പിടിച്ചെടുക്കുന്ന രേഖകളുടെ അടിസ്ഥാനത്തിലാകും വരുംദിവസങ്ങളിൽ ചോദ്യം ചെയ്യലിലേക്ക് കടക്കുക.
തൃശ്ശൂർ, എറണാകുളം, കോഴിക്കോട്, മലപ്പുറം ജില്ലകളിലെ വിവിധ കേന്ദ്രങ്ങളിലാണ് റെയ്ഡ് നടക്കുന്നത്. കോഴിക്കോട്ട് ഏഴിടത്തും തൃശ്ശൂരിൽ അഞ്ചിടത്തും മലപ്പുറത്ത് മൂന്നിടത്തുമാണ് പ്രധാനമായും പരിശോധന. തൃശ്ശൂരിൽ ഒല്ലൂർ പോലീസ് എടുത്ത കേസിന്റെ തുടർച്ചയായി കുട്ടനെല്ലൂർ സർവ്വീസ് സഹകരണ ബാങ്കിന്റെ പ്രധാന ശാഖകളിലും അഞ്ചേരിച്ചിറ, വെസ്റ്റ് അഞ്ചേരി, പടവരാട് എന്നിവിടങ്ങളിലും റെയ്ഡ് നടക്കുന്നുണ്ട്. പ്രവർത്തന പരിധിക്ക് പുറത്തുള്ളവർക്ക് വായ്പ നൽകൽ, ചെറിയ ഈടിൽ ഇരട്ടി വായ്പ അനുവദിക്കൽ, ഒരേ വസ്തുവിൽ അഞ്ചിലധികം വായ്പകൾ നൽകൽ തുടങ്ങിയ ക്രമക്കേടുകളാണ് ഇവിടെ സിപിഐഎം ഭരണസമിതിക്കെതിരെയുള്ള ആരോപണങ്ങൾ.
എറണാകുളത്ത് അങ്കമാലി അർബൻ സഹകരണ ബാങ്ക് തട്ടിപ്പുമായി ബന്ധപ്പെട്ട് കേസിലെ പ്രതിയായ അക്കൗണ്ടന്റ് ഷിജുവിന്റെ വീട്, അങ്കമാലി സർവീസ് സഹകരണ ബാങ്ക്, മുഖ്യപ്രതിയായിരുന്ന പരേതനായ പി.ടി. പോളിന്റെ വസതി എന്നിവിടങ്ങളിലാണ് ഇഡി സംഘമെത്തിയത്. മലപ്പുറത്ത്, കഴിഞ്ഞ മൂന്ന് വർഷമായി നിക്ഷേപകർക്ക് തുക തിരികെ നൽകാത്തതിനെതിരെ പ്രതിഷേധം നിലനിൽക്കുന്ന തെന്നല സർവ്വീസ് സഹകരണ ബാങ്കിലെ മുൻ ഡയറക്ടർമാരുടെ വീടുകളിലാണ് റെയ്ഡ്. 90 വർഷമായി മുസ്ലിം ലീഗ് ഭരണത്തിലുള്ള തെന്നല ബാങ്കിനെതിരെ നിക്ഷേപകർ നൽകിയ പരാതിയുടെ അടിസ്ഥാനത്തിലാണ് ഈ നടപടി.
