തിരുവനന്തപുരം: രാജ്യത്ത് നടപ്പാക്കിയ എസ്ഐആർ (SIR) വഴി 13 കോടിയോളം പൗരന്മാർ വോട്ടർപട്ടികയിൽ നിന്ന് ഒഴിവാക്കപ്പെട്ടുവെന്നും ഈ നടപടി അടിയന്തരമായി റദ്ദാക്കണമെന്നും നടൻ പ്രകാശ് രാജ് ആവശ്യപ്പെട്ടു. വിഷയത്തിൽ മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെ സമഗ്രമായ അന്വേഷണം നടത്തണമെന്നും തിരുവനന്തപുരത്ത് നടത്തിയ വാർത്താസമ്മേളനത്തിൽ അദ്ദേഹം പറഞ്ഞു.
എന്യൂമറേഷൻ ഫോമുകൾ ഉപയോഗിച്ച് നടത്തിയ പരിശോധനകൾക്ക് പിന്നാലെ ബീഹാറിലും ബംഗാളിലുമടക്കം ലക്ഷക്കണക്കിന് ആളുകളാണ് പുറത്തായത്; 38 ലക്ഷത്തിലധികം പേർ അകാരണമായി ഒഴിവാക്കപ്പെട്ടതായി കണ്ടെത്തിയിട്ടുണ്ട്. വീട്ടിൽ ആളെ കണ്ടില്ലെന്ന കാരണം പറഞ്ഞ് വോട്ട് റദ്ദാക്കുകയാണെന്നും, ആദിവാസികൾ, ദളിതർ, ക്രിസ്ത്യാനികൾ, മുസ്‌ലിംകൾ, ഇടതുപക്ഷക്കാർ എന്നിവർ കൂട്ടത്തോടെ പട്ടികയിൽ നിന്ന് പുറന്തള്ളപ്പെട്ടതിന് പിന്നിൽ വ്യക്തമായ അജണ്ടയുണ്ടെന്നും അദ്ദേഹം കുറ്റപ്പെടുത്തി. എസ്ഐആർ നടപ്പാക്കിയതോടെ പല പ്രാദേശിക കക്ഷികളും തകർന്നതായും പ്രകാശ് രാജ് ചൂണ്ടിക്കാട്ടി.
തങ്ങൾക്ക് ആവശ്യമുള്ളവരെ നിയമിക്കാനാണോ തെരഞ്ഞെടുപ്പ് കമ്മീഷണറെ തിരഞ്ഞെടുക്കുന്ന ചട്ടങ്ങളിൽ മാറ്റം വരുത്തിയതെന്ന് അദ്ദേഹം ചോദിച്ചു. ആറുമാസത്തിനുള്ളിൽ എന്തിനാണ് ഇത്ര തിടുക്കപ്പെട്ട് എസ്ഐആർ നടപ്പാക്കിയതെന്ന് കാണിച്ച് അഞ്ജലി ഭരദ്വാജ് വിവരാവകാശ അപേക്ഷ നൽകിയിട്ടും മറുപടി നൽകിയിട്ടില്ലെന്നും, യുവാക്കളും പൊതുജനങ്ങളും യാഥാർത്ഥ്യം തിരിച്ചറിഞ്ഞ് ശക്തമായ പോരാട്ടവുമായി രംഗത്തിറങ്ങണമെന്നും അദ്ദേഹം ആഹ്വാനം ചെയ്തു.
