ഡൽഹി: വർദ്ധിച്ചുവരുന്ന ഊർജ്ജ ആവശ്യകതയും വൈദ്യുതി പ്രതിസന്ധിയും പരിഹരിക്കാൻ കേന്ദ്ര പൊതുമേഖലാ സ്ഥാപനമായ എൻടിപിസിയുമായി ചേർന്ന് നിർണായക പദ്ധതികൾ നടപ്പാക്കാൻ സംസ്ഥാന സർക്കാർ ധാരണയിലെത്തിയതായി മുഖ്യമന്ത്രി വി.ഡി. സതീശൻ അറിയിച്ചു. കായംകുളത്ത് 2000 MWh ശേഷിയുള്ള വൻകിട ബാറ്ററി എനർജി സ്റ്റോറേജ് സിസ്റ്റം (BESS) കെഎസ്ഇബിയും എൻടിപിസിയും എൻടിപിസി ഗ്രീൻ എനർജി ലിമിറ്റഡും (NGEL) സംയുക്തമായി സ്ഥാപിക്കും; ഇതിനായുള്ള ധാരണാപത്രം ഉടൻ ഒപ്പുവെക്കും. ഇതിന് പുറമെ ശ്രീകണ്ഠപുരം, പോത്തൻകോട് എന്നിവിടങ്ങളിൽ 80 MWh വീതം ശേഷിയുള്ള സംഭരണ പദ്ധതികൾ 2027 മാർച്ചോടെ പ്രവർത്തനക്ഷമമാക്കും.
സംസ്ഥാനത്തെ അടിയന്തര വൈദ്യുതി ക്ഷാമം നേരിടാനായി മഹാരാഷ്ട്രയിലെ എൻടിപിസി സിന്നർ പ്ലാന്റിൽ നിന്ന് യൂണിറ്റിന് 5.18 രൂപ നിരക്കിൽ 300 MW വരെ വൈദ്യുതി ലഭ്യമാക്കും. കായംകുളത്തെ നിലവിലുള്ള 27 MW സോളാർ പദ്ധതി വേഗത്തിലാക്കാൻ പൂർണ്ണ പിന്തുണ നൽകുന്നതിനൊപ്പം, കേരളത്തിനായി സമർപ്പിത വൈദ്യുതി നിലയം സ്ഥാപിക്കണമെന്ന ആവശ്യവും എൻടിപിസിക്ക് മുന്നിൽ ഉന്നയിച്ചിട്ടുണ്ട്.
ഇതിന്റെ ഭാഗമായി തെലങ്കാനയിലെ രാമഗുണ്ടം പവർ പ്ലാന്റിൽ നിന്ന് വൈദ്യുതി ലഭ്യമാക്കുന്നതിനുള്ള പിപിഎ (പവർ പർച്ചേസ് എഗ്രിമെന്റ്) ഒപ്പിടാൻ എൻടിപിസി സമ്മതിച്ചിട്ടുണ്ട്. കെഎസ്ഇബിയുടെ സാങ്കേതിക, മാനേജ്‌മെന്റ് പ്രവർത്തനമികവ് ഉയർത്തുന്നതിനായി എൻടിപിസിയുടെ സാങ്കേതിക വൈദഗ്ദ്ധ്യം ഉറപ്പാക്കുമെന്നും, പീക്ക് സമയങ്ങളിലെ ലോഡ് നിയന്ത്രിക്കാൻ ഈ കരാറുകൾ സംസ്ഥാനത്തിന് മുതൽക്കൂട്ടാകുമെന്നും മുഖ്യമന്ത്രി വ്യക്തമാക്കി.
