മലപ്പുറം: മലപ്പുറത്ത് പരസ്യമായ കൊലവിളി പ്രസംഗവുമായി കെപിസിസി അംഗം രംഗത്ത്. യൂത്ത് കോൺഗ്രസ് നേതൃത്വം ആവശ്യപ്പെട്ടാൽ ആവശ്യമെങ്കിൽ തല്ലിക്കൊല്ലാൻ പോലും കേരള പോലീസ് തയ്യാറാകുമെന്നാണ് കെപിസിസി അംഗമായ ഇഫ്തിഖാറുദ്ദീൻ പ്രസ്താവിച്ചത്. കഴിഞ്ഞദിവസം വളാഞ്ചേരിയിൽ യൂത്ത് കോൺഗ്രസ് സംഘടിപ്പിച്ച പ്രതിഷേധ പരിപാടിയിൽ സംസാരിക്കവെയായിരുന്നു അദ്ദേഹത്തിന്റെ ഈ വിവാദ പരാമർശം. നിലവിൽ കേരള പോലീസ് തങ്ങളുടെ വരുതിയിലാണെന്നും ഇയാൾ അവകാശപ്പെട്ടു.
തിരുവനന്തപുരം യൂണിവേഴ്സിറ്റി കോളേജ് സംഘർഷം ഉൾപ്പെടെ എസ്എഫ്ഐയും പോലീസും തമ്മിൽ തെരുവിൽ ഏറ്റുമുട്ടിയ സംഭവങ്ങളെ മുൻനിർത്തിയായിരുന്നു കെപിസിസി അംഗത്തിന്റെ ഈ പ്രതികരണം. തല്ലിക്കൊല്ലാനാണ് നിർദ്ദേശം നൽകുന്നതെങ്കിൽ പോലീസ് അതിനും മടിക്കില്ലെന്ന് ഇഫ്തിഖാറുദ്ദീൻ പറഞ്ഞു. പോലീസ് അടിച്ചമർത്തിയിട്ടുണ്ടെങ്കിൽ അത് തങ്ങൾ നിർദ്ദേശിച്ചിട്ടു തന്നെയാണ് ചെയ്തതെന്നും അദ്ദേഹം ആവർത്തിച്ചു. രണ്ടത്താണി സ്വദേശിയായ ഇഫ്തിഖാറുദ്ദീൻ പ്രസംഗത്തിലുടനീളം ഇത്തരത്തിലുള്ള പ്രകോപനപരമായ കൊലവിളികളാണ് നടത്തിയത്.
