കൊല്ലം: അന്തരിച്ച സിപിഐഎം നേതാവ് കോടിയേരി ബാലകൃഷ്ണന്റെ ചിത്രമടങ്ങിയ ഫ്ലക്സ് ബോർഡ് നശിപ്പിച്ച സംഭവത്തിൽ മാപ്പപേക്ഷിച്ച് അക്ബർ ഷാ. കോൺഗ്രസിന്റെ ഫ്ലക്സാണെന്ന് തെറ്റിദ്ധരിച്ചാണ് താൻ അത് കീറിയതെന്നാണ് ഇയാളുടെ വിശദീകരണം. ഫ്ലക്സ് നശിപ്പിച്ച വ്യക്തിക്ക് സംഘടനയുമായി യാതൊരു ബന്ധവുമില്ലെന്ന എസ്എഫ്ഐയുടെ വാദങ്ങളെയും അക്ബർ ഷാ തള്ളിപ്പറഞ്ഞു. താൻ മുൻപ് എസ്എഫ്ഐയിലും നിലവിൽ ഡിവൈഎഫ്ഐയിലും പ്രവർത്തിക്കുന്നയാളാണെന്ന് ഇയാൾ വ്യക്തമാക്കി.
മാധ്യമ ശ്രദ്ധ നേടാനോ വാർത്തകളിൽ നിറയാനോ വേണ്ടിയല്ല താനിത് ചെയ്തതെന്നും അക്ബർ ഷാ പറഞ്ഞു. താൻ മുൻകാലത്ത് എസ്എഫ്ഐയിലും ബിജെപിയിലും പ്രവർത്തിച്ചിട്ടുണ്ട്. സംഘടനയുമായി ബന്ധമില്ലെന്നും നുഴഞ്ഞുകയറ്റക്കാരനാണെന്നും ഇപ്പോൾ പാർട്ടിക്കാർ ആരോപിക്കുന്നത് ശരിയല്ലെന്നും, താൻ മുൻപ് എസ്എഫ്ഐയുടെ സജീവ പ്രവർത്തകൻ തന്നെയായിരുന്നുവെന്നും ഇയാൾ വെളിപ്പെടുത്തി.
തനിക്ക് സംഭവിച്ച പിഴവ് ബോധ്യപ്പെട്ടതായും അക്ബർ ഷാ വ്യക്തമാക്കി. കോടിയേരി സഖാവിന്റെ ഫ്ലക്സാണെന്ന് അറിയാതെയാണ് താൻ അത് നശിപ്പിച്ചത്. കോൺഗ്രസിന്റെ ബോർഡാണെന്ന് കരുതി ചെയ്തതാണ്, അതിനാൽ എല്ലാവരും തനിക്ക് മാപ്പ് നൽകണമെന്നും ഇയാൾ അഭ്യർത്ഥിച്ചു. അതേസമയം, ഫ്ലക്സ് ബോർഡ് കീറി നശിപ്പിച്ച വ്യക്തിക്കെതിരെ കേസെടുത്ത് കർശന നിയമനടപടി സ്വീകരിക്കണമെന്ന് ആവശ്യപ്പെട്ട് എസ്എഫ്ഐ പോലീസിൽ പരാതി നൽകിയിട്ടുണ്ട്.
