പാലക്കാട്: പി.കെ. ശശിയെ പരോക്ഷമായി ലക്ഷ്യംവെച്ച് രൂക്ഷമായ ഭാഷയിൽ വിമർശനമുന്നയിച്ച് സി.പി.ഐ.എം സംസ്ഥാന കമ്മിറ്റി അംഗം എൻ.എൻ. കൃഷ്ണദാസ്. എത്ര വലിയ മുടിയനായ പുത്രനായാലും കുടിച്ച മുലപ്പാൽ വിഷമാണെന്ന് പറയരുതെന്ന് അദ്ദേഹം മുന്നറിയിപ്പ് നൽകി. മുൻകാലങ്ങളിൽ കെ.ആർ. ഗൗരിയമ്മ അടക്കമുള്ള നേതാക്കൾ പാർട്ടിയോട് വിയോജിച്ച് പുറത്തുപോയിട്ടുണ്ട്. എന്നിട്ടും മരണവേളയിൽ അർഹമായ എല്ലാ ആദരവുകളോടും കൂടിയാണ് വലിയ ചുടുകാട്ടിൽ അവരുടെ സംസ്കാരം നടത്തിയത് എന്ന കാര്യം എല്ലാവരും ഓർമ്മിക്കുന്നത് നന്നായിരിക്കുമെന്നും കൃഷ്ണദാസ് ചൂണ്ടിക്കാട്ടി.
പാർട്ടിയിൽ നിന്ന് സകല ആനുകൂല്യങ്ങളും സ്ഥാനമാനങ്ങളും കൈപ്പറ്റിയ ശേഷം, അവസാന കഴുക്കോലും സ്വന്തമാക്കി മറുപക്ഷത്തേക്ക് പോവുകയും തുടർന്ന് പാർട്ടിയെ നോക്കി പരിഹസിക്കുകയും ചെയ്യുന്ന ചിലരുണ്ട്. പാർട്ടിയിൽ പ്രവർത്തിച്ച കാലം വെറുതെയായെന്ന് ഒരു വിദ്വാൻ പ്രസംഗിച്ചതായി അറിയാൻ കഴിഞ്ഞു. എത്ര വലിയ വഴിപിഴച്ചവനായാലും തന്നെ പോറ്റിയ അമ്മയെ തള്ളിപ്പറയരുതെന്നാണ് ഓർമ്മിപ്പിക്കാനുള്ളത്. അത് കടുത്ത മനുഷ്യത്വരഹിതമായ നിലപാടാണ്. അതിനുള്ള തിരിച്ചടി അവർക്ക് ലഭിക്കാതിരിക്കില്ലെന്നും അദ്ദേഹം പ്രസംഗത്തിൽ വ്യക്തമാക്കി.
പല കാലഘട്ടങ്ങളിലും പലരും പാർട്ടിയെ എതിർത്തു നിന്നിട്ടുണ്ട്. ഗൗരിയമ്മ പോലും അത്തരത്തിൽ എതിർപ്പുകൾ ഉയർത്തിയിരുന്നു. എന്നാൽ മരണവേളയിൽ പാർട്ടി പതാക പുതപ്പിക്കണമെന്ന് വി.എസിനോട് ആവശ്യപ്പെട്ടത് ഗൗരിയമ്മ തന്നെയാണ്. ആലപ്പുഴയിലെ പാർട്ടിയെ അവർ ഇതിലും കൂടുതൽ വിമർശിച്ചിട്ടുണ്ട്. എന്നിട്ടും മക്കളില്ലാതിരുന്ന ഗൗരിയമ്മയുടെ അവസാന നാളുകളിൽ എല്ലാ പരിചരണങ്ങളും നൽകിയത് ആലപ്പുഴയിലെ സി.പി.ഐ.എം പ്രവർത്തകരായിരുന്നു. അന്ത്യസമയത്ത് പൂർണ്ണ ബഹുമതികളോടെയാണ് വലിയ ചുടുകാട്ടിൽ അവരെ സംസ്കരിച്ചത്. ഈ ചരിത്രം എല്ലാവരും മനസ്സിൽ കരുതിയാൽ കൊള്ളാമെന്ന് അദ്ദേഹം പറഞ്ഞു.
തിരഞ്ഞെടുപ്പിൽ തോറ്റതുകൊണ്ട് പാർട്ടിയെ പൂർണ്ണമായി ഇല്ലാതാക്കാമെന്ന് ആരും കരുതേണ്ടതില്ലെന്നും, ചെങ്കൊടിയെ പിഴുതെറിയാൻ കെൽപ്പുള്ള ഒരാളും കേരളത്തിൽ ജനിച്ചിട്ടില്ലെന്നാണ് പ്രധാനമന്ത്രി മോദിയോടും ഇ.ഡിയോടും വി.ഡി. സതീശനോടും പറയാനുള്ളതെന്നും കൃഷ്ണദാസ് കൂട്ടിച്ചേർത്തു.
