പൂപ്പാറ: സംസ്ഥാനത്ത് വീണ്ടും കാട്ടാനയുടെ ആക്രമണത്തിൽ ജീവനഹാനി. ഇടുക്കി പൂപ്പാറ പന്തടിക്കളം സ്വദേശിയായ വിജയൻ പി.വി. (47) ആണ് കൊല്ലപ്പെട്ടത്. ഇന്ന് പുലർച്ചെയായിരുന്നു നാടിനെ നടുക്കിയ സംഭവം. 'ചക്കക്കൊമ്പൻ' എന്ന് പ്രദേശവാസികൾ വിളിക്കുന്ന കാട്ടാനയാണ് ആക്രമണം നടത്തിയതെന്നാണ് നാട്ടുകാർ വ്യക്തമാക്കുന്നത്.
കഴിഞ്ഞ നാല് മാസത്തിനിടയിൽ ഈ പ്രദേശത്ത് കാട്ടാനയാക്രമണത്തിൽ കൊല്ലപ്പെടുന്ന നാലാമത്തെ വ്യക്തിയാണ് വിജയൻ. ജോലിസ്ഥലത്തെ ഷെഡിൽ നിന്നും അതിരാവിലെ സ്വന്തം വീട്ടിലേക്ക് നടന്നുപോകുന്നതിനിടെയാണ് ഇയാൾ ആനയുടെ മുന്നിൽപ്പെട്ടത്. ഗുരുതരമായി പരിക്കേറ്റ വിജയൻ സംഭവസ്ഥലത്തുതന്നെ മരണപ്പെടുകയായിരുന്നു.
ഏതാനും ദിവസങ്ങൾക്ക് മുൻപാണ് ഇടുക്കി ശാന്തൻപാറയിൽ കാട്ടാനയുടെ ആക്രമണത്തിൽ ഒരു ഇതരസംസ്ഥാന തൊഴിലാളി കൊല്ലപ്പെട്ടത്. ജോലി കഴിഞ്ഞ് താമസസ്ഥലത്തേക്ക് മടങ്ങുന്നതിനിടെ റോഡിലൂടെ നടന്നുപോവുകയായിരുന്ന യുവാവിനെ കാട്ടാന ആക്രമിക്കുകയായിരുന്നു.
അതിനിടെ, പാലക്കാട് അട്ടപ്പാടിയിലും കാട്ടാനയുടെ ആക്രമണത്തിൽ ഒരു വിനോദസഞ്ചാരിക്ക് ജീവൻ നഷ്ടമായിരുന്നു. അട്ടപ്പാടി പരിപ്പന്തറയിൽ ഭവാനിപ്പുഴയുടെ തീരത്തുവെച്ചാണ് സംഭവം നടന്നത്. നായാടിക്കുന്ന് സ്വദേശിനിയായ ബുഷറ (52) ആണ് മരിച്ചത്. ഭവാനിപ്പുഴയോരത്ത് ബന്ധുക്കൾക്കൊപ്പം നിൽക്കവെ ആനയുടെ ആക്രമണത്തിൽ ഗുരുതരമായി പരിക്കേറ്റ ഇവർ താവളത്തെ സ്വകാര്യ ആശുപത്രിയിലെ തീവ്രപരിചരണ വിഭാഗത്തിൽ ചികിത്സയിലിരിക്കെ ഇന്നലെ വൈകുന്നേരം നാല് മണിയോടെയാണ് മരണത്തിന് കീഴടങ്ങിയത്.
