കോഴിക്കോട്: കേന്ദ്ര സർക്കാരിന്റെ പരിസ്ഥിതി ലോല മേഖലാ (ഇ.എസ്.എ) കരട് വിജ്ഞാപനവുമായി ബന്ധപ്പെട്ട് സംസ്ഥാന സർക്കാരിന്റെ നിലപാടുകളെ നിശിതമായി വിമർശിച്ച് സമസ്ത മുഖപത്രമായ 'സുപ്രഭാതം' എഡിറ്റോറിയൽ. മലയോര നിവാസികൾ കടുത്ത ഭീതിയിലാണെന്ന് വ്യക്തമാക്കുന്ന മുഖപ്രസംഗം, വിഷയം നിയമസഭയിൽ സമഗ്രമായി ചർച്ച ചെയ്യേണ്ടതായിരുന്നുവെന്ന് ഓർമ്മിപ്പിക്കുന്നു. പ്രതികൂല കാലാവസ്ഥയോടും വന്യജീവി ശല്യത്തോടും നിരന്തരം പോരാടി ജീവിക്കുന്ന മലയോര കർഷകരുടെ ഉപജീവനത്തിന്മേൽ കരിനിഴൽ വീഴ്ത്തുന്നതാണ് ഇപ്പോഴത്തെ നടപടികളെന്നും വിമർശനമുണ്ട്.
പശ്ചിമഘട്ട സംരക്ഷണവുമായി ബന്ധപ്പെടുത്തി കഴിഞ്ഞ ഒരു പതിറ്റാണ്ടിലേറെയായി മലയോര മേഖലയിലുള്ള ആശങ്കകൾ വീണ്ടും ശക്തമാവുകയാണ്. മാധവ് ഗാഡ്ഗിൽ കമ്മിറ്റി റിപ്പോർട്ടും തുടർന്നുണ്ടായ കസ്തൂരിരംഗൻ സമിതി റിപ്പോർട്ടും, ഇതിന്റെ പശ്ചാത്തലത്തിൽ 2014 മുതൽ പുറത്തിറങ്ങിയ കരട് വിജ്ഞാപനങ്ങളും പർവത മേഖലകളിൽ വലിയ സംഘർഷങ്ങൾക്ക് ഇടയാക്കിയിരുന്നു. ഇപ്പോൾ പുറത്തുവന്ന ഏഴാമത് കരടിലെ വ്യവസ്ഥകളും കർഷകരെ അനിശ്ചിതത്വത്തിലാക്കുകയാണ്. സാറ്റലൈറ്റ് സാങ്കേതികവിദ്യ മാത്രം അടിസ്ഥാനമാക്കി തയാറാക്കിയ ഭൂപടങ്ങളിലെ പാളിച്ചകൾ കൃത്യമായി പരിശോധിക്കണമെന്നും സമസ്ത ആവശ്യപ്പെടുന്നു.
ഈ പ്രതിസന്ധിയിൽ കർണാടക സർക്കാർ സ്വീകരിച്ച ശക്തമായ നിലപാടാണ് കേരളവും മാതൃകയാക്കേണ്ടത്. ജനവാസ മേഖലകളെ ഇ.എസ്.എ പരിധിയിൽ അതേപടി നിലനിർത്താനാവില്ലെന്ന് വ്യക്തമാക്കി ഡി.കെ. ശിവകുമാർ അവിടുത്തെ നിയമസഭയിൽ പ്രമേയം പാസാക്കിയിരുന്നു. ആവശ്യമായ തിരുത്തലുകൾ ശുപാർശ ചെയ്യാൻ മുൻ ഹൈക്കോടതി ജഡ്ജിയുടെ നേതൃത്വത്തിൽ ഉന്നതതല സമിതിക്ക് രൂപം നൽകുകയും, പ്രത്യേക നിയമസഭാ സമ്മേളനം വിളിച്ചുചേർക്കുകയും ചെയ്തു. ഇത്തരം കർക്കശമായ നടപടികളാണ് കേരളത്തിൽ നിന്നും ഉണ്ടാകേണ്ടിയിരുന്നതെന്ന് മുഖപ്രസംഗം ചൂണ്ടിക്കാട്ടുന്നു.
മറ്റ് രാഷ്ട്രീയ വിവാദങ്ങളുടെ പുകമറയിൽ സംസ്ഥാനത്തെ 50 ലക്ഷത്തോളം വരുന്ന കർഷകരുടെ ഗൗരവമേറിയ പ്രശ്നങ്ങൾ അവഗണിക്കുന്നത് ജനകീയ സർക്കാരിനും യു.ഡി.എഫിനും ചേർന്നതല്ല. അടിയന്തരമായ ഭരണപരമായ ഇടപെടലുകളും വ്യക്തമായ രാഷ്ട്രീയ നിലപാടുകളുമാണ് കേരളം പ്രതീക്ഷിക്കുന്നത്. പരിസ്ഥിതിയേയും ഒപ്പം കർഷകരേയും ഒരുപോലെ സംരക്ഷിക്കാനുള്ള കടമയിൽ നിന്ന് സർക്കാരിന് ഒഴിഞ്ഞുമാറാനാവില്ല. കരട് വിജ്ഞാപനത്തിലെ അശാസ്ത്രീയമായ നിർദ്ദേശങ്ങൾ തിരുത്താൻ സംസ്ഥാന സർക്കാർ ശക്തമായി ഇടപെടണമെന്നും, ആവശ്യമായ ഭേദഗതികൾ വരുത്താൻ കേന്ദ്രത്തിന് മേൽ സമ്മർദ്ദം ചെലുത്തണമെന്നും സമസ്ത ഓർമ്മിപ്പിക്കുന്നു.
വിഷയത്തിൽ സർക്കാരിനെതിരെ പ്രതികരണവുമായി താമരശ്ശേരി ബിഷപ്പ് മാർ റെമീജിയോസ് ഇഞ്ചനാനിയലും രംഗത്തെത്തി. ഇ.എസ്.എ വ്യവസ്ഥകൾ സംബന്ധിച്ച് ജനങ്ങൾക്ക് വ്യക്തത നൽകാൻ സർക്കാരിന് കഴിഞ്ഞിട്ടില്ലെന്നും ഇതിൽ കടുത്ത അമർഷവും പ്രതിഷേധവുമുണ്ടെന്നും അദ്ദേഹം പറഞ്ഞു. റവന്യൂ ഭൂമി ഒഴിവാക്കുമെന്ന് ഭരണാധികാരികളും ഉദ്യോഗസ്ഥരും വാക്കാൽ പറയുന്നുണ്ടെങ്കിലും ജനങ്ങൾക്ക് വിശ്വാസ്യത ലഭിക്കുന്നില്ല. റവന്യൂ ഭൂമി പരിസ്ഥിതി ലോല പട്ടികയിൽ ഉൾപ്പെട്ടിട്ടുണ്ടോ എന്ന് പരിശോധിക്കാൻ ജനങ്ങൾക്ക് പൂർണ്ണ അവകാശമുണ്ട്. ഉമ്മൻ വി. ഉമ്മൻ റിപ്പോർട്ട് അംഗീകരിക്കാനാവില്ലെന്നും അതിലെ വിവരങ്ങൾ തെറ്റാണെന്ന് നേരത്തെ സർക്കാരിനെ അറിയിച്ചിരുന്നതായും ബിഷപ്പ് വ്യക്തമാക്കി. നിലവിൽത്തന്നെ മലയോര നിവാസികൾക്ക് ബാങ്ക് വായ്പകളും പട്ടയങ്ങളും ലഭിക്കാത്ത സാഹചര്യമുണ്ട്. പ്രത്യേക സഭാ സമ്മേളനം വിളിച്ചുചേർക്കുകയും കേന്ദ്രത്തെ നേരിൽ കാണാൻ പ്രതിനിധി സംഘത്തെ അയക്കുകയും ചെയ്ത കർണാടക സർക്കാരിന്റെ മാതൃക കേരളവും പിന്തുടരണം. ജീവിക്കാനുള്ള മൗലികാവകാശം ചോദ്യം ചെയ്യപ്പെട്ടാൽ ശക്തമായ ജനകീയ സമരങ്ങളിലേക്ക് കടക്കുമെന്നും മാർ റെമീജിയോസ് ഇഞ്ചനാനിയൽ മുന്നറിയിപ്പ് നൽകി.
