പത്തനംതിട്ട: ശബരിമല മണ്ഡല തീർത്ഥാടന മുന്നൊരുക്കങ്ങളുടെ ഭാഗമായുള്ള ടെൻഡർ നടപടികളിൽ തിരുവിതാംകൂർ ദേവസ്വം ബോർഡിന് വലിയ വീഴ്ച പറ്റിയതായി പരാതി. മാസങ്ങൾ വൈകിയാണ് ഇത്തവണ ടെൻഡർ നടപടികളിലേക്ക് കടന്നതെന്നാണ് പ്രധാന ആക്ഷേപം. നിലയ്ക്കലിലെയും ശബരിമലയിലെയും വാണിജ്യ സ്ഥാപനങ്ങളുടെയും ഹോട്ടലുകളുടെയും ലേലനടപടികൾ ഇതുവരെയും പൂർത്തിയാക്കിയിട്ടില്ല. ഇതിനുപുറമെ, പൂജയ്ക്കും പ്രസാദ നിർമ്മാണത്തിനുമുള്ള നെയ്യ്, ഏലയ്ക്ക എന്നിവ സംഭരിക്കുന്നതിനുള്ള ടെൻഡറുകളും വിളിച്ചിട്ടില്ല. മോദകം, ഉണ്ണിയപ്പം എന്നിവയുടെ നിർമ്മാണ കരാറുകൾ ഫയലിൽത്തന്നെ കുടുങ്ങിക്കിടക്കുകയാണ്. അരവണ വിതരണത്തിനാവശ്യമായ ടിന്നുകൾ ലഭ്യമാക്കാനും ഇതുവരെ സാധിച്ചിട്ടില്ലെന്ന് പരാതിയിൽ ചൂണ്ടിക്കാട്ടുന്നു. കോൺഗ്രസ് അനുകൂല ദേവസ്വം ബോർഡ് ജീവനക്കാരുടെ സംഘടനയാണ് ബോർഡിന്റെ ഈ അനാസ്ഥയ്ക്കെതിരെ മുഖ്യമന്ത്രിക്ക് നേരിട്ട് പരാതി നൽകിയത്.
മണ്ഡല-മകരവിളക്ക് മഹോത്സവത്തിന് ഇനി കേവലം 54 ദിവസങ്ങൾ മാത്രമാണ് ശേഷിക്കുന്നത്. കഴിഞ്ഞ വർഷങ്ങളിൽ മേയ് മാസം മുതൽ ആരംഭിക്കാറുള്ള ടെൻഡർ നടപടികൾ, തീർത്ഥാടനത്തിന് ചുരുങ്ങിയ ദിവസങ്ങൾ മാത്രം ബാക്കിനിൽക്കെ പകുതിപോലും പൂർത്തിയായിട്ടില്ലെന്നാണ് വിമർശനം. ശർക്കര സംഭരണത്തിനുള്ള ടെൻഡർ ഉറപ്പിച്ചെങ്കിലും അന്തിമ കരാറിൽ ഇനിയും ഒപ്പുവെച്ചിട്ടില്ല. അരവണ ടിന്നുകളുടെ സംഭരണവുമായി ബന്ധപ്പെട്ട നടപടികളിലും ബോർഡിന്റെ ഭാഗത്തുനിന്ന് വലിയ മന്ദഗതിയാണുണ്ടാകുന്നത്. നിലയ്ക്കലിലും സന്നിധാനത്തുമുള്ള കടകളുടെ ലേലം നടക്കാത്ത പശ്ചാത്തലത്തിൽ, തിരക്ക് നിയന്ത്രിക്കാനെന്ന പേരിൽ ചില വ്യാപാരസ്ഥാപനങ്ങൾ ഒഴിവാക്കാൻ ബോർഡ് ആലോചിക്കുന്നുണ്ട്. ഇതുസംബന്ധിച്ച് എക്സിക്യൂട്ടീവ് ഓഫീസറോട് ദേവസ്വം ബോർഡ് പ്രസിഡന്റ് അടിയന്തര റിപ്പോർട്ട് ആവശ്യപ്പെട്ടിട്ടുണ്ട്.
എന്നാൽ, ഇത്തവണ ടെൻഡർ വ്യവസ്ഥകളിൽ പ്രസിഡന്റ് കെ. ജയകുമാർ നവീകരണങ്ങൾ കൊണ്ടുവന്നിരുന്നു. മുൻപത്തെപ്പോലെ നേരിട്ട് ലേലം വിളിക്കുന്നതിന് പകരം ഇ-ടെൻഡറും ഇ-ലേലവും നടപ്പിലാക്കാൻ തുടങ്ങിയതാണ് കാലതാമസത്തിന് കാരണമായതെന്നാണ് ബോർഡിന്റെ ഔദ്യോഗിക വിശദീകരണം.
അതിനിടെ, ദേവസ്വം വകുപ്പ് മന്ത്രിയും ബോർഡും തമ്മിലുള്ള ഭിന്നത രൂക്ഷമായി തുടരുന്നതിനിടയിൽ ബോർഡ് പ്രസിഡന്റ് കെ. ജയകുമാർ ഇന്ന് മുഖ്യമന്ത്രിയെ നേരിൽ കാണും. നിലവിലെ സംഭവവികാസങ്ങൾ മുഖ്യമന്ത്രിയെ നേരിട്ട് ബോധ്യപ്പെടുത്തുകയാണ് കൂടിക്കാഴ്ചയുടെ ലക്ഷ്യം. ശബരിമലയിലെ ഒരുക്കങ്ങളിൽ ഗുരുതര വീഴ്ചകളുണ്ടെന്ന് ദേവസ്വം മന്ത്രി കെ. മുരളീധരൻ തുറന്നടിച്ചതും, ആ ആരോപണങ്ങൾ നിഷേധിച്ച് കെ. ജയകുമാർ രംഗത്തെത്തിയതും നേരത്തെ വലിയ വാർത്തയായിരുന്നു. മന്ത്രിയുമായുള്ള തർക്കം കുറച്ചുകാലമായി പുകയുന്ന പശ്ചാത്തലത്തിൽ മുഖ്യമന്ത്രിയെ കാണാൻ കെ. ജയകുമാർ തന്നെയാണ് സമയം ആവശ്യപ്പെട്ടത്. ഇന്നത്തെ മന്ത്രിസഭാ യോഗത്തിന് ശേഷം ഇരുവരും കൂടിക്കാഴ്ച നടത്തും. ദേവസ്വം ബോർഡിനെ കുറ്റക്കാരായി ചിത്രീകരിച്ച് മണ്ഡലകാല ഒരുക്കങ്ങൾ അട്ടിമറിക്കാൻ ഇടനിലക്കാരുടെയും ഉദ്യോഗസ്ഥരുടെയും ലോബി പ്രവർത്തിക്കുന്നുണ്ടെന്നാണ് ബോർഡിന്റെ നിലപാട്. കൂടാതെ, ദേവസ്വം മന്ത്രിയുടെ ഓഫീസിൽ നിന്നുള്ള അനാവശ്യ സമ്മർദ്ദവും ബോർഡിന് പ്രതിസന്ധിയുണ്ടാക്കുന്നുണ്ട്.
