കൊച്ചി: പരിസ്ഥിതി ലോല മേഖലാ (ഇ.എസ്.എ) അതിർത്തികളെ സംബന്ധിച്ച് വ്യക്തമായ വിവരങ്ങളും ഭൂപടങ്ങളും നിർമ്മിച്ച് ജനങ്ങളെ വിശ്വാസത്തിലെടുത്തുള്ള നടപടികൾ സംസ്ഥാന സർക്കാർ എത്രയും വേഗം സ്വീകരിക്കണമെന്ന് സിറോ മലബാർ സഭ മേജർ ആർച്ച് ബിഷപ്പ് മാർ റാഫേൽ തട്ടിൽ. പരാതികളും ആക്ഷേപങ്ങളും ബോധിപ്പിക്കാനുള്ള സമയപരിധി അവസാനിക്കാറായിട്ടും ഭരണകൂടത്തിന്റെ ഭാഗത്തുനിന്നുള്ള നടപടികളിൽ വ്യക്തതയില്ലാത്തത് അതീവ ഗുരുതരമായ ആശങ്കയ്ക്ക് ഇടയാക്കുന്നുവെന്ന് അദ്ദേഹം പ്രസ്താവിച്ചു. പശ്ചിമഘട്ട പരിസ്ഥിതി സംവേദക മേഖല സംബന്ധിച്ച കേന്ദ്ര സർക്കാരിന്റെ ഏഴാമത് കരട് വിജ്ഞാപനത്തിന്മേൽ പ്രതികരണങ്ങൾ അറിയിക്കാനുള്ള അവസാന തീയതി സെപ്റ്റംബർ 25-ന് അവസാനിക്കാനിരിക്കെയാണ് സിറോ മലബാർ സഭ വാർത്താക്കുറിപ്പിലൂടെ നിലപാട് പരസ്യമാക്കിയത്.

പന്ത്രണ്ട് വർഷത്തിലധികമായി നീളുന്ന ഇ.എസ്.എ നിർണ്ണയ പ്രക്രിയകൾ വഴി മലയോര ജനതയുടെ ആകുലതകൾക്ക് ശാശ്വത പരിഹാരം കാണാൻ സാധിച്ചിട്ടില്ലെന്ന് പത്രക്കുറിപ്പ് ഓർമ്മിപ്പിക്കുന്നു. ആദ്യ വിജ്ഞാപനത്തിലുണ്ടായിരുന്ന അടിസ്ഥാന വീഴ്ചകൾ അതേപടി ഇപ്പോഴും ആവർത്തിക്കപ്പെടുന്നത് ജനങ്ങളുടെ ഭീതി ഇരട്ടിയാക്കുകയാണ്. 2026 ജൂലൈ 27-ന് കേന്ദ്രം പ്രസിദ്ധീകരിച്ച ഏഴാമത്തെ കരട് വിജ്ഞാപനത്തിൽ കേരളത്തിലെ 131 വില്ലേജുകളിലായുള്ള 9,993.7 ചതുരശ്ര കിലോമീറ്റർ വിസ്തൃതി ഇ.എസ്.എ പട്ടികയിൽ ഉൾപ്പെടുത്തിയിട്ടുണ്ട്. തന്മൂലം ജനവാസ കേന്ദ്രങ്ങളും കർഷകരുടെ കൃഷിഭൂമികളും പരിസ്ഥിതി ലോല മേഖലയിൽ ഉൾപ്പെടുമോ എന്ന ആശങ്ക ശക്തമാണ്. കരട് രേഖയിൽ പരാമർശിക്കുന്ന പ്രദേശങ്ങൾ കൃത്യമായി പരിശോധിച്ച് പരാതിപ്പെടാൻ ആവശ്യമായ വില്ലേജ് തല ജിയോ കോർഡിനേറ്റ് മാപ്പുകൾ ഇതുവരെയും സാധാരണക്കാർക്ക് ലഭ്യമാക്കിയിട്ടില്ല. മാത്രമല്ല, കരട് വിജ്ഞാപനം മലയാളത്തിൽ പ്രസിദ്ധീകരിക്കണമെന്ന കോടതി നിർദ്ദേശവും നടപ്പിലാക്കപ്പെട്ടിട്ടില്ലെന്ന് മാർ റാഫേൽ തട്ടിൽ ചൂണ്ടിക്കാട്ടി.

പ്രസ്തുത 131 വില്ലേജുകളിലെയും ജനവാസ മേഖലകൾ, കൃഷിയിടങ്ങൾ, തോട്ടങ്ങൾ, ടൗൺഷിപ്പുകൾ, ഇതര സ്ഥാപനങ്ങൾ എന്നിവയെ പൂർണ്ണമായി ഒഴിവാക്കണമെന്നും, വനംവകുപ്പിന്റെ നേരിട്ടുള്ള അധികാരത്തിലുള്ള വനപ്രദേശങ്ങളെയും സംരക്ഷിത വനമേഖലകളെയും മാത്രം ഉൾപ്പെടുത്തി പുതിയ റിപ്പോർട്ട് കേന്ദ്രത്തിന് സമർപ്പിക്കണമെന്നും സഭ ആവശ്യപ്പെട്ടു. തദ്ദേശ സ്വയംഭരണ സ്ഥാപനങ്ങൾ, ജനപ്രതിനിധികൾ, കർഷക സംഘടനകൾ, പൊതുജനങ്ങൾ എന്നിവരുമായി വിശദമായ കൂടിയാലോചനകൾ നടത്തി കൃത്യമായ വിസ്തൃതിയും മാപ്പും ഉൾപ്പെടുത്തിയുള്ള റിപ്പോർട്ടാണ് തയ്യാറാക്കേണ്ടത്.

ഉമ്മൻ വി. ഉമ്മൻ സമിതി റിപ്പോർട്ടിലെ അശാസ്ത്രീയ നിർദ്ദേശങ്ങൾ കേന്ദ്രത്തിന് കൈമാറിയതുവഴി സംഭവിച്ച തെറ്റുകൾ തുടർച്ചയായ ഏഴ് കരട് വിജ്ഞാപനങ്ങളിലായിട്ടും തിരുത്തി നൽകാൻ സംസ്ഥാന സർക്കാരിന് സാധിക്കാതെ പോയത് അത്ഭുതപ്പെടുത്തുന്നു. 131 വില്ലേജുകളുടെ ആകെ വിസ്തീർണ്ണം 12,900 ചതുരശ്ര കിലോമീറ്റർ മാത്രമായിരുന്നു. അതിൽ ജനവാസകേന്ദ്രങ്ങളും കൃഷിയിടങ്ങളും തോട്ടങ്ങളും ഉൾപ്പെടെയുള്ള റവന്യൂ ഭൂമി കേവലം 3,000 ചതുരശ്ര കിലോമീറ്ററിൽ താഴെയാണെന്നാണ് ഉമ്മൻ കമ്മിറ്റി രേഖപ്പെടുത്തിയിരിക്കുന്നത്. ഈ വില്ലേജുകളിലെ റവന്യൂ ഭൂമിയെ വനഭൂമിയായി തെറ്റായി കണക്കാക്കിയതാണ് ഇതിന് കാരണം. ഈ സാങ്കേതിക പിഴവ് തിരുത്തി നൽകാൻ സർക്കാർ അടിയന്തരമായി മുന്നോട്ടുവരണം.

ഉമ്മൻ കമ്മിറ്റി റിപ്പോർട്ട് അടിയന്തരമായി റദ്ദാക്കി തദ്ദേശ സ്ഥാപനങ്ങളുമായും വിവിധ ജനകീയ കൂട്ടായ്മകളുമായും ചർച്ച ചെയ്ത് സമഗ്രമായ പുതിയ ശുപാർശകൾ സമർപ്പിക്കണം. കഴിഞ്ഞ ഒരു പതിറ്റാണ്ടിലേറെയായി മാറിമാറി വന്ന സർക്കാരുകളൊന്നും തന്നെ ഈ അടിസ്ഥാന പിഴവുകൾ തിരുത്തി വ്യക്തമായ ഏകീകൃത റിപ്പോർട്ട് നൽകിയിട്ടില്ല. യഥാർത്ഥ വനഭൂമിയും സംരക്ഷിത മേഖലകളും മാത്രം ഉൾപ്പെടുന്ന ഇ.എസ്.എ പ്രദേശങ്ങളുടെ കൃത്യമായ വിസ്തീർണ്ണമോ ജിയോ കോർഡിനേറ്റ് മാപ്പുകളോ ഇതുവരെ കേന്ദ്രത്തിന് സമർപ്പിച്ചിട്ടില്ലെന്നാണ് അറിയാൻ കഴിയുന്നത്. വ്യക്തമായ രേഖകളുള്ള സ്വന്തം ഭൂമിയുടെ മേൽപ്പോലും ബാങ്ക് വായ്പകളും ക്രയവിക്രയങ്ങളും നടത്താനാകാതെ പതിറ്റാണ്ടുകളായി മലയോര ജനത അനുഭവിക്കുന്ന ദുരിതങ്ങൾ പരിഹരിക്കാൻ സർക്കാർ ശ്രമിക്കാത്തത് ജനങ്ങളെ മുൾമുനയിൽ നിർത്തുകയാണ്.

ഇ.എസ്.എ കരട് വിജ്ഞാപനവുമായി ബന്ധപ്പെട്ട് സംസ്ഥാനം സമർപ്പിക്കാൻ ഉദ്ദേശിക്കുന്ന റിപ്പോർട്ട് 98 വില്ലേജുകളിലായുള്ള 8,590 ചതുരശ്ര കിലോമീറ്റർ പ്രദേശമാണെന്ന് മുഖ്യമന്ത്രിയുടെ പ്രസ്താവനകളിൽ നിന്ന് വ്യക്തമാണ്. മുൻ സർക്കാരിന്റെ കാലത്തുണ്ടായിരുന്ന അതേ റിപ്പോർട്ടിന്റെ മറ്റൊരു പകർപ്പാണിത്. ഈ വില്ലേജുകളിൽ ഉൾപ്പെടുന്ന ഫോറസ്റ്റ് അല്ലെങ്കിൽ സംരക്ഷിത പ്രദേശം വനംവകുപ്പിന്റെ കണക്കുകൾ പ്രകാരം ഏഴായിരത്തിൽ താഴെ ചതുരശ്ര കിലോമീറ്റർ മാത്രമാണ്. ഉമ്മൻ കമ്മിറ്റി റിപ്പോർട്ടിൽ സംഭവിച്ച തെറ്റായ കണക്കനുസരിച്ചാണ് 123 വില്ലേജുകളിലായി 9,107 ചതുരശ്ര കിലോമീറ്റർ വനഭൂമിയുണ്ടെന്ന് കാണിച്ചിരുന്നത്. ഈ തെറ്റായ റിപ്പോർട്ടിന്റെ ചുവടുപിടിച്ച് തയ്യാറാക്കിയ, 98 വില്ലേജുകളിലെ സംരക്ഷിത മേഖലയെന്ന പേരിലുള്ള 8,590 ചതുരശ്ര കിലോമീറ്റർ കണക്കും തീർത്തും അബദ്ധമാണ്. ഈ റിപ്പോർട്ട് അടിസ്ഥാനമാക്കി അന്തിമ ഉത്തരവിറങ്ങിയാൽ, നിലവിലുള്ള ഏഴായിരത്തിൽ താഴെ ചതുരശ്ര കിലോമീറ്റർ വനം കഴിച്ച് ബാക്കി വരുന്ന 1,600-ലധികം ചതുരശ്ര കിലോമീറ്റർ പ്രദേശം കണ്ടെത്തേണ്ടിവരിക സാധാരണക്കാരുടെ കൃഷിയിടങ്ങളിൽ നിന്നും ജനവാസ കേന്ദ്രങ്ങളിൽ നിന്നുമായിരിക്കും. ഇത് സാധാരണ ജനങ്ങളുടെ ഭൂമിയിൽ കർശനമായ വനനിയമങ്ങൾ ബാധകമാകുന്ന ഗുരുതര സാഹചര്യത്തിലേക്ക് വഴിതുറക്കും.

പശ്ചിമഘട്ടത്തിന്റെ സംരക്ഷണം അത്യന്താപേക്ഷിതമാണ്. അതോടൊപ്പം തന്നെ കൃത്യമായ രേഖകളോടെ കാലങ്ങളായി അവിടെ അധിവസിക്കുകയും കൃഷി ചെയ്യുകയും ചെയ്യുന്ന ജനങ്ങളുടെ ജീവനും സ്വത്തിനും ജീവിതമാർഗ്ഗങ്ങൾക്കും പൂർണ്ണ സുരക്ഷ ഉറപ്പാക്കണം. പ്രകൃതി സംരക്ഷണവും ജനങ്ങളുടെ ജീവിക്കാനുള്ള അവകാശവും പരസ്പരവിരുദ്ധമായി കാണാതെ, മനുഷ്യനെ മുൻനിർത്തിയുള്ള സുസ്ഥിര വികസന പരിഹാരങ്ങളാണ് ഉണ്ടാവേണ്ടതെന്നും ആർച്ച് ബിഷപ്പ് വാർത്താക്കുറിപ്പിൽ ഓർമ്മിപ്പിച്ചു.