തിരുവനന്തപുരം: ചിറയിൻകീഴിൽ കോൺഗ്രസ് പ്രവർത്തകർ തമ്മിലുണ്ടായ പരസ്യമായ കയ്യാങ്കളിയിൽ കർശന അച്ചടക്ക നടപടിയുമായി കെ.പി.സി.സി നേതൃത്വം. സംഭവത്തിൽ രമ്യ ഹരിദാസ് എം.എൽ.എയ്ക്ക് പാർട്ടി ഔദ്യോഗികമായി താക്കീത് നൽകി. യൂത്ത് കോൺഗ്രസ് നേതാവ് സജിത്ത് മുട്ടമ്പലത്തിനും മുന്നറിയിപ്പ് നൽകിയിട്ടുണ്ട്. ഇരുവിഭാഗങ്ങളും പോലീസിൽ നൽകിയിട്ടുള്ള പരാതികളും കേസുകളും ഉടനടി പിൻവലിക്കണമെന്നും നേതൃത്വം കർശന നിർദ്ദേശം നൽകി.
ചിറയിൻകീഴിലെ ഉൾപ്പാർട്ടി തർക്കങ്ങൾക്ക് ശാശ്വത പരിഹാരം കാണുന്നതിനായി പാലോട് രവിയുടെ അധ്യക്ഷതയിൽ പ്രത്യേക സമിതി രൂപീകരിച്ചിട്ടുണ്ട്. എം. വിൻസെന്റ്, കെ.എസ്. ശബരീനാഥൻ, നെയ്യാറ്റിൻകര സനൽ എന്നിവരാണ് ഈ സമിതിയിലെ മറ്റ് അംഗങ്ങൾ. ചിറയിൻകീഴിൽ അരങ്ങേറിയ പരസ്യമായ സംഘർഷം പാർട്ടിയുടെ സൽപ്പേരിന് വലിയ കളങ്കമുണ്ടാക്കിയെന്നാണ് നേതൃത്വത്തിന്റെ വിലയിരുത്തൽ. പ്രസ്തുത സംഭവത്തിൽ രമ്യ ഹരിദാസ് എം.എൽ.എയ്ക്ക് ഗുരുതരമായ വീഴ്ച സംഭവിച്ചതായി അന്വേഷണ കമ്മീഷൻ കണ്ടെത്തിയിരുന്നു. എം.എം. ഹസൻ നേതൃത്വം നൽകിയ സമിതിയാണ് ഇത് സംബന്ധിച്ച റിപ്പോർട്ട് കെ.പി.സി.സി പ്രസിഡന്റ് സണ്ണി ജോസഫിന് സമർപ്പിച്ചത്. രമ്യാ ഹരിദാസിന്റെ ഭാഗത്തുനിന്ന് പക്വതയില്ലാത്ത പെരുമാറ്റമാണുണ്ടായതെന്നും, വ്യക്തിപരമായി അപവാദ പ്രചാരണം നേരിട്ടപ്പോൾ വിഷയം കെ.പി.സി.സി നേതൃത്വത്തെ അറിയിക്കുന്നതിന് പകരം അനാവശ്യ വിവാദങ്ങൾ സൃഷ്ടിക്കുകയാണ് ചെയ്തതെന്നും അന്വേഷണ റിപ്പോർട്ടിൽ ചൂണ്ടിക്കാണിച്ചിരുന്നു.
കഴിഞ്ഞ സെപ്റ്റംബർ നാലിനായിരുന്നു ചിറയിൻകീഴിൽ രമ്യ ഹരിദാസ് എം.എൽ.എയും പ്രാദേശിക കോൺഗ്രസ് നേതാക്കളും തമ്മിലുള്ള തർക്കം തെരുവ് സംഘർഷത്തിൽ കലാശിച്ചത്. എം.എൽ.എയും മറ്റ് ജനപ്രതിനിധികളും ഉദ്യോഗസ്ഥരും പങ്കെടുത്ത ഔദ്യോഗിക യോഗത്തിൽ രമ്യ ഹരിദാസിന്റെ വിശ്വസ്തനായ പാളയം പ്രദീപ് പങ്കെടുത്തതാണ് തർക്കങ്ങൾക്ക് തുടക്കമിട്ടത്. ഔദ്യോഗിക യോഗത്തിൽ പങ്കെടുത്ത പ്രദീപ് ചില കരാറുകാർക്ക് നിർദ്ദേശങ്ങൾ നൽകിയതിനെതിരെ പ്രാദേശിക നേതാക്കൾക്കിടയിൽ ശക്തമായ അമർഷം ഉയർന്നിരുന്നു. ഇതിനിടെ യോഗത്തിൽ പ്രദീപ് പങ്കെടുക്കുന്നതിന്റെ ചിത്രങ്ങൾ എം.എൽ.എ തന്നെ വാട്സ്ആപ്പ് ഗ്രൂപ്പിൽ പോസ്റ്റ് ചെയ്തു. ഇതിനെ ചോദ്യം ചെയ്തുകൊണ്ട് കോൺഗ്രസ് പ്രാദേശിക നേതാവായ സജാദ് ഗ്രൂപ്പിൽ പ്രതികരണമറിയിച്ചു. തുടർന്ന് അന്നു രാത്രിയോടെ രമ്യ ഹരിദാസും സംഘവും സജാദിന്റെ വീട്ടിലേക്ക് നേരിട്ടെത്തി. സജാദിന്റെ മകളെക്കൊണ്ട് ഫോണിലെ സന്ദേശങ്ങൾ വായിപ്പിക്കാൻ ശ്രമിച്ചെന്ന് ആരോപണമുയർന്നു. സംഭവമറിഞ്ഞ് ജില്ലാ പഞ്ചായത്ത് അംഗവും വാട്സ്ആപ്പ് ഗ്രൂപ്പ് അഡ്മിനുമായ സജിത്ത് മുട്ടമ്പലവും കൂട്ടരും സ്ഥലത്തെത്തിയതോടെ വാക്കുതർക്കം രൂക്ഷമാവുകയും ഒടുവിൽ കയ്യാങ്കളിയിൽ അവസാനിക്കുകയുമായിരുന്നു.
