മലപ്പുറം: സ്ത്രീകളെ പൊതുവേദികളിൽ പ്രദർശിപ്പിക്കരുതെന്ന കാന്തപുരം എ.പി. അബൂബക്കർ മുസ്ലിയാരുടെ നിലപാടിനെ നിശിതമായി വിമർശിച്ച മുഖ്യമന്ത്രി വി.ഡി. സതീശന്റെ വാക്കുകളിൽ മുസ്ലിം ലീഗിനകത്ത് അതൃപ്തി പുകയുന്നതായി സൂചന. ഒരു പ്രമുഖ സമുദായ നേതാവിനെതിരെ ഇത്രയും കടുത്ത ഭാഷയിൽ പരസ്യവിമർശനം ഉന്നയിക്കാൻ മുഖ്യമന്ത്രി തുനിയരുതായിരുന്നുവെന്നാണ് ലീഗിലെ ഒരു വിഭാഗം നേതാക്കളുടെ അഭിപ്രായം. മതവിശ്വാസികളോട് നടത്തിയ ആഭ്യന്തര പരാമർശത്തിൽ മുഖ്യമന്ത്രി നേരിട്ട് പ്രതികരിക്കേണ്ട യാതൊരു ആവശ്യവുമില്ലായിരുന്നുവെന്നും ഇവർ ചൂണ്ടിക്കാട്ടുന്നു. ഈ തുറന്ന വിമർശനത്തെ സമുദായത്തിനെതിരായ നിലപാടായി മറ്റ് ചില കേന്ദ്രങ്ങൾ വളച്ചൊടിച്ച് പ്രചരിപ്പിച്ചേക്കാമെന്ന ആശങ്കയും നേതാക്കൾക്കുണ്ട്. ഇതിനിടെ, മുഖ്യമന്ത്രിയുടെ വാക്കുകൾക്ക് പിന്നാലെ കാന്തപുരത്തിന് പരോക്ഷ പിന്തുണയുമായി ജിഫ്രി തങ്ങളും രംഗത്തെത്തിയിരുന്നു.
കഴിഞ്ഞ ദിവസത്തെ വാർത്താസമ്മേളനത്തിൽ മാധ്യമങ്ങളുടെ ചോദ്യങ്ങൾക്ക് മറുപടി പറയവേയാണ് കാന്തപുരത്തിന്റെ ചിന്താഗതിയോട് തനിക്കോ സർക്കാരിനോ ഒട്ടും യോജിപ്പില്ലെന്ന് മുഖ്യമന്ത്രി തുറന്നടിച്ചത്. ഇസ്ലാമിക ചരിത്രത്തിൽ സ്ത്രീകൾ കൈവരിച്ച മുന്നേറ്റങ്ങൾ എണ്ണിപ്പറഞ്ഞ അദ്ദേഹം, കാന്തപുരത്തിന്റേത് പത്തൊമ്പതാം നൂറ്റാണ്ടിലെ ചിന്താഗതിയാണെന്നും കുറ്റപ്പെടുത്തിയിരുന്നു. ഇതിനെതിരെ എ.പി സുന്നി വിഭാഗത്തിന്റെ ബഹുജന പ്രസ്ഥാനമായ കേരള മുസ്ലിം ജമാഅത്ത് രൂക്ഷമായ പ്രതിഷേധവുമായി എത്തുകയും മുഖ്യമന്ത്രി മാപ്പ് പറയണമെന്ന് ആവശ്യപ്പെടുകയും ചെയ്തു. മുഖ്യമന്ത്രിയുടെ ഈ രൂക്ഷമായ പ്രതികരണം വിഷയത്തെ കൂടുതൽ സങ്കീർണ്ണവും സജീവവുമായ ചർച്ചയാക്കി മാറ്റിയെന്നാണ് ലീഗ് നേതൃത്വത്തിന്റെ വിലയിരുത്തൽ.
നേരത്തെ കാന്തപുരത്തിന്റെ വിവാദ പ്രസ്താവന പുറത്തുവന്നപ്പോൾ, അദ്ദേഹം ഒരു മതപണ്ഡിതനാണെന്നും സ്ത്രീകളുടെ സുരക്ഷ മുൻനിർത്തിയാകാം അത്തരമൊരു പ്രതികരണം നടത്തിയതെന്നുമായിരുന്നു സാദിഖലി ശിഹാബ് തങ്ങൾ വ്യക്തമാക്കിയത്. ഭൂരിഭാഗം ലീഗ് നേതാക്കളും ഇതേ നിലപാടാണ് സ്വീകരിച്ചിരുന്നത്. എന്നാൽ മുഖ്യമന്ത്രിയുടെ പരസ്യവിമർശനം സംഘപരിവാർ പ്രൊഫൈലുകൾ ഉൾപ്പെടെ ദുരുപയോഗം ചെയ്യാൻ സാധ്യതയുണ്ടെന്നും ഇത് വരാനിരിക്കുന്ന തെരഞ്ഞെടുപ്പുകളിൽ തിരിച്ചടിയായേക്കാമെന്നും ലീഗ് നേതൃത്വം ഭയപ്പെടുന്നു. എ.പി വിഭാഗവുമായി നിലവിൽ പാർട്ടി കൂടുതൽ സൗഹൃദമുണ്ടാക്കാൻ ശ്രമിക്കുന്ന സാഹചര്യത്തിൽ മുഖ്യമന്ത്രിയുടെ ഭാഗത്തുനിന്നുണ്ടായ ഈ നീക്കം ലീഗിനുള്ളിൽ കടുത്ത അതൃപ്തിക്ക് കാരണമായിട്ടുണ്ട്.
