കണ്ണൂർ: പ്രതിപക്ഷ നേതാവ് പിണറായി വിജയന്റെ വസതിക്ക് മുൻപിൽ സുരക്ഷാ ജീവനക്കാർക്കായി ഉപയോഗിച്ചിരുന്ന പോലീസ് ജീപ്പ് മാറ്റി. കണ്ണൂർ പിണറായി പാണ്ഡ്യാലമുക്കിലുള്ള 'പ്രവിക്' വീടിന് മുൻവശത്ത് നിർത്തിയിട്ടിരുന്ന വാഹനമാണ് ഒഴിവാക്കിയത്. കാവൽ ചുമതലയുണ്ടായിരുന്ന ഉദ്യോഗസ്ഥരുടെ വിശ്രമകേന്ദ്രമായാണ് ഈ ജീപ്പ് പ്രവർത്തിച്ചിരുന്നത്. പോലീസുകാർ തങ്ങുന്ന വാഹനത്തിനുള്ളിൽ പ്രാഥമിക സൗകര്യങ്ങൾ പോലുമില്ലാത്ത അവസ്ഥ മുൻപ് വലിയ ചർച്ചകൾക്ക് വഴിവെച്ചിരുന്നു. പുതിയ ഷെൽട്ടർ സ്ഥാപിക്കുന്നതിനുള്ള നടപടികളുടെ ഭാഗമായാണ് ഇപ്പോൾ പഴയ ജീപ്പ് നീക്കം ചെയ്തത്. വസതിക്ക് തൊട്ടടുത്തായിത്തന്നെ പുതിയ ഷെൽട്ടർ സജ്ജീകരിക്കുമെന്നാണ് ലഭിക്കുന്ന വിവരം.
KL 01 BR 9569 എന്ന രജിസ്ട്രേഷൻ നമ്പറിലുള്ള വാഹനമാണ് ഇപ്പോൾ മാറ്റിയത്. പിണറായി വിജയൻ മുഖ്യമന്ത്രിയായിരുന്ന വേളയിൽ പാണ്ഡ്യാലമുക്കിലെ വീട് കാണാനും ദൃശ്യങ്ങൾ പകർത്താനുമായി നിരവധി ആളുകൾ എത്തിയതിനെ തുടർന്നാണ് ജീപ്പ് നിർത്തിയിട്ട് പോലീസിനെ സുരക്ഷയ്ക്കായി വിന്യസിച്ചത്. ഒരു എസ്.ഐയും രണ്ട് സിവിൽ പോലീസ് ഓഫീസർമാരുമാണ് അക്കാലത്ത് ഇവിടെ കാവൽ നിന്നിരുന്നത്.
പുതിയ ഷെൽട്ടർ യാഥാർത്ഥ്യമാകുന്നതോടെ ഡ്യൂട്ടിയിലുള്ള പോലീസുകാർ ദീർഘനാളായി നേരിടുന്ന ബുദ്ധിമുട്ടുകൾക്ക് പരിഹാരമാകുമെന്നാണ് കരുതുന്നത്. പുതിയ ഭരണകൂടം നിലവിൽ വന്ന ഘട്ടത്തിൽ ജീപ്പ് ഒഴിവാക്കി പകരം ഷെൽട്ടർ ഒരുക്കുമെന്ന് ഉറപ്പുനൽകിയിരുന്നു. തുടർന്ന് ആഭ്യന്തര വകുപ്പിന്റെ പ്രത്യേക നിർദ്ദേശപ്രകാരമാണ് ജീപ്പ് അവിടെനിന്ന് മാറ്റിയത്.
