കോഴിക്കോട്: കാന്തപുരം എ.പി. അബൂബക്കർ മുസ്ലിയാരുടെ വിവാദമായ സ്ത്രീവിരുദ്ധ പരാമർശത്തെച്ചൊല്ലി യു.ഡി.എഫ് മുന്നണിക്കുള്ളിൽ അഭിപ്രായവ്യത്യാസം ശക്തമാകുന്നു. മുഖ്യമന്ത്രി വി.ഡി. സതീശൻ കാന്തപുരത്തിന്റെ വാക്കുകളെ പരസ്യമായി തള്ളിക്കളഞ്ഞപ്പോഴും, അദ്ദേഹത്തിന് പിന്തുണയുമായി ഉറച്ചുനിൽക്കുകയാണ് മുസ്ലിം ലീഗ്. സ്ത്രീകളുടെ സുരക്ഷ മുൻനിർത്തിയാണ് കാന്തപുരം സംസാരിച്ചതെന്ന സാദിഖലി ശിഹാബ് തങ്ങളുടെ അഭിപ്രായത്തെ പൂർണ്ണമായി അനുകൂലിച്ചുകൊണ്ട് മുസ്ലിം ലീഗ് നേതാവ് ഇ.ടി. മുഹമ്മദ് ബഷീർ എം.പി രംഗത്തെത്തി.
സാദിഖലി തങ്ങൾ ഉന്നതമായ വ്യക്തിത്വമാണെന്നും അദ്ദേഹം സ്വീകരിക്കുന്ന നിലപാടുകൾ വിവേകപൂർണ്ണമാണെന്നും റിപ്പോർട്ടറിനോട് സംസാരിക്കവെ ഇ.ടി. മുഹമ്മദ് ബഷീർ വ്യക്തമാക്കി. നാട്ടിൽ ജനകീയമായ മറ്റ് ഒട്ടനവധി പ്രശ്നങ്ങൾ ചർച്ച ചെയ്യാനുണ്ടെന്നും, അതിനിടയിൽ ഇത്തരം കാര്യങ്ങൾക്ക് അനാവശ്യ പ്രസക്തി നൽകേണ്ടതില്ലെന്നും അദ്ദേഹം പറഞ്ഞു. ഇങ്ങനെയുള്ള വിഷയങ്ങൾ വലിച്ചുനീട്ടി കൊണ്ടുപോകേണ്ട കാര്യമില്ല. അഭിപ്രായപ്രകടനങ്ങൾ നടത്തി പ്രശ്നം കൂടുതൽ വഷളാക്കാൻ താല്പര്യപ്പെടുന്നില്ലെന്നും, കാര്യങ്ങൾ ശാന്തമായി മുന്നോട്ടുപോകട്ടെ എന്നാണ് തന്റെ നിലപാടെന്നും അദ്ദേഹം കൂട്ടിച്ചേർത്തു.
ഇസ്ലാമിക ചരിത്രത്തിലെ ഉദാഹരണങ്ങൾ എടുത്തുപറഞ്ഞായിരുന്നു മുഖ്യമന്ത്രി വി.ഡി. സതീശൻ കാന്തപുരത്തിന്റെ പരാമർശങ്ങളെ എതിർത്തത്. കാന്തപുരത്തിന്റെ ചിന്താഗതി പത്തൊൻപതാം നൂറ്റാണ്ടിലേതാണെന്നും ഇന്നത്തെ പുരോഗമന സമൂഹത്തിന് ഒട്ടും ചേരുന്നതല്ലെന്നും മുഖ്യമന്ത്രി കുറ്റപ്പെടുത്തിയിരുന്നു. എന്നാൽ, മുഖ്യമന്ത്രിയുടെ ഭാഗത്തുനിന്നുണ്ടായ ഈ പ്രതികരണം അദ്ദേഹത്തിന്റെ പദവിക്ക് ഒട്ടും അനുയോജ്യമല്ലെന്ന് എ.പി വിഭാഗം എസ്.വൈ.എസ് സംസ്ഥാന ജനറൽ സെക്രട്ടറി റഹ്മത്തുള്ള സഖാഫി എളമരം തിരിച്ചടിച്ചു. ബി.ജെ.പിയുടെ സമ്മർദ്ദത്തിന് വഴങ്ങിയാണ് മുഖ്യമന്ത്രി ഇത്തരമൊരു നിലപാടെടുത്തതെന്നും, തലേദിവസം ബി.ജെ.പി വിമർശനം ഉന്നയിച്ചപ്പോൾത്തന്നെ ഇത് വ്യക്തമായിരുന്നുവെന്നും എസ്.വൈ.എസ് ഫേസ്ബുക്കിലൂടെ പ്രതികരിച്ചു. ഇതിനുപുറമെ, മുഖ്യമന്ത്രി തന്റെ പരാമർശം പിൻവലിച്ച് മുസ്ലിം സമൂഹത്തോട് മാപ്പുപറയണമെന്ന് കേരള മുസ്ലിം ജമാഅത്തും ആവശ്യപ്പെട്ടു. ഇസ്ലാമിക ചരിത്രത്തെ തെറ്റായ രീതിയിലാണ് മുഖ്യമന്ത്രി വ്യാഖ്യാനിച്ചതെന്നും എസ്.വൈ.എസ് ആരോപിച്ചു.
അതേസമയം, കാന്തപുരത്തിന്റെ പ്രസ്താവനയുമായി ബന്ധപ്പെട്ട് ഇടതുമുന്നണിയിലും ഭിന്നാഭിപ്രായം ഉടലെടുത്തിട്ടുണ്ട്. കാന്തപുരത്തെ ന്യായീകരിച്ചുകൊണ്ട് കെ.ടി. ജലീൽ, ടി.കെ. ഹംസ എന്നിവരും ഐ.എൻ.എൽ നേതാക്കളും രംഗത്തെത്തി. എന്നാൽ കാന്തപുരത്തിന്റെ നിലപാടുകളെയും അതിനെ പിന്തുണച്ച മുസ്ലിം ലീഗിനെയും നിശിതമായി വിമർശിച്ചുകൊണ്ടാണ് സി.പി.ഐ.എം നേതാവ് പാലൊളി മുഹമ്മദ് കുട്ടി പ്രതികരിച്ചത്. കാന്തപുരത്തെ ന്യായീകരിച്ച ലീഗ് നേതൃത്വത്തിനെതിരെ വിമർശനവുമായി സി.പി.ഐ നേതാവ് ആനി രാജയും രംഗത്തെത്തി.
