കോഴിക്കോട്: മുസ്ലിം സ്റ്റുഡന്റ്സ് ഫെഡറേഷൻ (എം.എസ്.എഫ്) പുതിയ സംസ്ഥാന ഭാരവാഹി പട്ടിക പുറത്തിറക്കി. പ്രസ്ഥാനത്തിന്റെ സംസ്ഥാന പ്രസിഡന്റായി ഷറഫുദ്ദീൻ പിലാക്കലിനെയും ജനറൽ സെക്രട്ടറിയായി സ്വാഹിബ് മുഹമ്മദിനെയും തെരഞ്ഞെടുത്തു. റാഷിദ് കോക്കൂരാണ് പുതിയ ട്രഷറർ. ഇവരെക്കൂടാതെ 11 വൈസ് പ്രസിഡന്റുമാരും 10 സെക്രട്ടറിമാരും ഉൾപ്പെടുന്നതാണ് പുതുതായി നിലവിൽ വന്ന സംസ്ഥാന സമിതി.
മുസ്ലിം ലീഗ് സംസ്ഥാന നേതൃത്വത്തിന്റെ നേരിട്ടുള്ള ഇടപെടലിലൂടെയാണ് ഭാരവാഹികളുടെ അന്തിമ പട്ടിക തയ്യാറാക്കിയത്. പി.കെ. നവാസ് പടിയിറങ്ങിയതിനെത്തുടർന്ന് പ്രസിഡന്റ് പദവിയുടെ താത്കാലിക ചുമതല നേരത്തെ തന്നെ ഷറഫുദ്ദീൻ പിലാക്കലിനായിരുന്നു നൽകിയിരുന്നത്.
നേതൃസ്ഥാനങ്ങൾക്കായി വിവിധ വിഭാഗങ്ങൾ അവകാശവാദം ഉന്നയിച്ചതോടെ ജില്ലാ തലങ്ങളിലടക്കം വലിയ അഭിപ്രായവ്യത്യാസങ്ങൾ ഉടലെടുത്തിരുന്നു. ഇതേത്തുടർന്ന് ജില്ലാ കമ്മിറ്റികളിൽ നിന്ന് വിശദമായി അഭിപ്രായം ആരായുകയും, തുടർന്ന് മുസ്ലിം ലീഗ് നേതൃത്വം സമവായത്തിലൂടെ സ്ഥാനങ്ങൾ നിശ്ചയിക്കുകയുമായിരുന്നു.
