തിരുവനന്തപുരം: സുകുമാരക്കുറുപ്പ് കേസ് നാല് പതിറ്റാണ്ടായി തുമ്പുണ്ടാക്കാൻ കഴിയാത്ത ഒരു ലോങ് പെൻഡിംഗ് (എൽ.പി) കേസാണെന്ന് ആഭ്യന്തര മന്ത്രി രമേശ് ചെന്നിത്തല. പ്രചരിക്കുന്ന വാർത്തകളുടെ സത്യാവസ്ഥ എന്താണെന്ന് വ്യക്തമാകേണ്ടതുണ്ടെന്ന് അദ്ദേഹം അഭിപ്രായപ്പെട്ടു. ബ്രൂണൈയിൽ സുകുമാരക്കുറുപ്പിന് സമാനമായ രൂപസാദൃശ്യമുള്ള പ്രായമായ ഒരാളെ കണ്ടുവെന്ന വിവരങ്ങളോട് പ്രതികരിക്കുകയായിരുന്നു അദ്ദേഹം.
നിലവിൽ പുറത്തുവരുന്നതെല്ലാം അഭ്യൂഹങ്ങൾ മാത്രമാണെന്ന് വ്യക്തമാക്കിയ ആഭ്യന്തര മന്ത്രി, സംഭവത്തെക്കുറിച്ച് അന്വേഷണം നടത്തി റിപ്പോർട്ട് സമർപ്പിക്കാൻ ക്രൈംബ്രാഞ്ച് എ.ഡി.ജി.പിയോട് ആവശ്യപ്പെട്ടിട്ടുണ്ടെന്ന് പറഞ്ഞു. ഡി.വൈ.എസ്.പി എച്ച്. വെങ്കിടേഷിനോടാണ് റിപ്പോർട്ട് നൽകാൻ ഇന്നലെ നിർദ്ദേശം നൽകിയത്. വിഷയത്തിൽ കൃത്യമായ അന്വേഷണം നടക്കട്ടെയെന്നും അദ്ദേഹം വ്യക്തമാക്കി. ചാക്കോ വധക്കേസുമായി ബന്ധപ്പെട്ട് അലി അക്ബറിന്റെ റിപ്പോർട്ട് ഒതുക്കിത്തീർത്തു എന്ന ആരോപണത്തിന് മറുപടിയായി, വയലാർ രവി ആഭ്യന്തര മന്ത്രിയായിരുന്ന കാലം മുതലുള്ള കേസായതിനാൽ ഇനി ഇതിൽ എന്ത് പൂഴ്ത്തിവെക്കാനാണെന്ന് അദ്ദേഹം ചോദിച്ചു. കേരള പോലീസ് ഇതിനകം ഇന്റർപോളുമായി ബന്ധപ്പെട്ടിട്ടുണ്ടെന്നും ചെന്നിത്തല കൂട്ടിച്ചേർത്തു.
