തിരുവനന്തപുരം: തലസ്ഥാനത്തെ ശ്രീകാര്യത്ത് ഓടിക്കൊണ്ടിരുന്ന കെ.എസ്.ആർ.ടി.സി ബസിൽ നിന്ന് റോഡിലേക്ക് വീണ് വിദ്യാർത്ഥിനിക്ക് പരിക്ക് പറ്റി. കിഴക്കേക്കോട്ട ഭാഗത്തേക്ക് സർവീസ് നടത്തുകയായിരുന്ന ബസിൽ യാത്ര ചെയ്യുന്നതിനിടെയാണ് അപകടമുണ്ടായത്.
മുൻവശത്തെ വാതിലിലൂടെ ബസിനുള്ളിൽ കയറിയ വിദ്യാർത്ഥിനി ഡോർ അടച്ചിരുന്നെങ്കിലും അതിന്റെ ലോക്ക് കൃത്യമായി വീണിരുന്നില്ല. വാഹനം മുന്നോട്ട് എടുത്തതിന് പിന്നാലെ വാതിൽ പെട്ടെന്ന് തുറന്നുപോവുകയും കുട്ടി പുറത്തേക്ക് തെറിച്ചുവീഴുകയുമായിരുന്നു. റോഡിലേക്ക് വീണ കുട്ടിയുടെ തലയ്ക്കാണ് പരിക്കേറ്റത്. സംഭവസമയം മറ്റ് യാത്രക്കാർ ബഹളം വെച്ചതിനെ തുടർന്ന് ബസ് ഉടനടി നിർത്തി. തുടർന്ന് പരിക്കേറ്റ കുട്ടിയെ അതേ ബസിൽ കയറ്റി തിരുവനന്തപുരം മെഡിക്കൽ കോളേജ് ആശുപത്രിയിൽ എത്തിച്ച് പ്രവേശിപ്പിച്ചു.
