തിരുവനന്തപുരം: സംസ്ഥാനത്തെ സഹകരണ സംഘങ്ങളിലെ ക്രമക്കേടുകൾക്കെതിരെ രാഷ്ട്രീയഭേദമന്യേ വിട്ടുവീഴ്ചയില്ലാത്ത നടപടിയുണ്ടാകുമെന്ന് മന്ത്രി എം. ലിജു. സി.പി.ഐ.എം എന്നോ കോൺഗ്രസ് എന്നോ നോക്കാതെ കുറ്റക്കാർക്കെതിരെ നടപടിയെടുക്കും. കേരളത്തിന്റെ സമ്പദ്വ്യവസ്ഥയുടെ നട്ടെല്ലാണ് സഹകരണ മേഖല. കേരള ബാങ്കിൽ പുതിയ അംഗത്വം നൽകുന്നത് സംബന്ധിച്ച് വിശദമായ പരിശോധന നടത്തും. മുൻപ് പെൻഷൻ വിതരണത്തെ കക്ഷിരാഷ്ട്രീയ താല്പര്യങ്ങൾക്കനുസരിച്ച് രാഷ്ട്രീയവൽക്കരിക്കുകയും ആ പരിഗണനയിൽ സംഘങ്ങളെ നിശ്ചയിക്കുകയുമാണുണ്ടായതെന്ന് മന്ത്രി ചൂണ്ടിക്കാട്ടി.
ധാരാളം ക്രമക്കേടുകൾ നടന്നിട്ടുണ്ടെന്നും സാമ്പത്തിക സ്ഥിതി വിലയിരുത്താതെ സംഘങ്ങൾക്ക് അംഗത്വം നൽകാനാവില്ലെന്നും അദ്ദേഹം വ്യക്തമാക്കി. സർക്കാരിന് 45 ശതമാനം ഓഹരി പങ്കാളിത്തമുള്ള സ്ഥാപനമായതിനാൽ കേരള ബാങ്കിൽ ഏകപക്ഷീയമായ തീരുമാനങ്ങൾ അനുവദിക്കില്ല. അതേസമയം, ക്ഷേമ പെൻഷൻ വിതരണത്തിൽ നിന്ന് സഹകരണ സംഘങ്ങളെ ഒഴിവാക്കിയ ധനവകുപ്പിന്റെ നടപടിയിൽ സഹകരണ വകുപ്പിന് ആശങ്കയുണ്ട്. ജില്ലാ ബാങ്കുകളെ കേരള ബാങ്കിൽ ലയിപ്പിച്ചത് തെറ്റായ നടപടിയായിരുന്നുവെന്നും അത് സഹകരണ മേഖലയ്ക്ക് ദോഷകരമായി ബാധിച്ചുവെന്നുമാണ് വിലയിരുത്തൽ. മലപ്പുറം ജില്ലാ ബാങ്ക് ലയന വിഷയത്തിൽ സുപ്രീം കോടതിയിൽ സർക്കാർ തങ്ങളുടെ നിലപാട് അറിയിക്കും. ഇതിനുപുറമെ, സംസ്ഥാനത്ത് പുതിയ മദ്യനയം തയ്യാറാക്കാനുള്ള നടപടികൾ തുടങ്ങിയതായും സെപ്റ്റംബർ ആദ്യവാരത്തോടെ വകുപ്പുതല ചർച്ചകൾ പൂർത്തിയാക്കുമെന്നും മന്ത്രി അറിയിച്ചു. വീര്യം കുറഞ്ഞ മദ്യത്തിനുള്ള നികുതിയിളവ് മദ്യനയത്തിന് അനുസൃതമായിരിക്കുമെന്നും യു.ഡി.എഫ് (UDF) നയത്തിനനുസരിച്ച് അന്തിമ തീരുമാനമെടുക്കുമെന്നും എം. ലിജു കൂട്ടിച്ചേർത്തു.
