തിരുവനന്തപുരം: തിരുവനന്തപുരം - എറണാകുളം റൂട്ടിൽ ആകാശയാത്രയ്ക്ക് തുല്യമായ പ്രീമിയം യാത്രാസൗകര്യങ്ങൾ ഒരുക്കിക്കൊണ്ട് കെ.എസ്.ആർ.ടി.സിയുടെ അത്യാധുനിക എ.സി എക്സിക്യൂട്ടീവ് വോൾവോ ബസ് സർവീസിന് തുടക്കമായി. തലസ്ഥാനത്ത് നിന്ന് രാവിലെ 5.30-ന് പുറപ്പെടുന്ന ബസ് കൊല്ലം, ആലപ്പുഴ വഴി രാവിലെ 9.45-ഓടെ എറണാകുളത്തെത്തും. തിരികെ വൈകുന്നേരം 5.30-ന് എറണാകുളത്ത് നിന്ന് പുറപ്പെട്ട് രാത്രി 9.45-ന് തിരുവനന്തപുരത്ത് തിരിച്ചെത്തും. തിങ്കൾ മുതൽ വെള്ളി വരെയുള്ള ദിവസങ്ങളിലാണ് ഈ ബിസിനസ് ക്ലാസ് സർവീസ് പ്രവർത്തിക്കുക. കൊല്ലം അയത്തിൽ, ആലപ്പുഴ കൊമ്മാടി, തോപ്പുംപടി, ഹൈക്കോടതി വഴി എറണാകുളത്തെത്തുന്ന ബസിന് പ്രധാന കേന്ദ്രങ്ങളിൽ സ്റ്റോപ്പുകൾ അനുവദിച്ചിട്ടുണ്ട്. ശനി, ഞായർ ദിവസങ്ങളിൽ ഈ സർവീസ് ഗുരുവായൂരിലേക്ക് നീട്ടുന്ന കാര്യവും കെ.എസ്.ആർ.ടി.സിയുടെ പരിഗണനയിലുണ്ട്.

യാത്രക്കാർക്ക് സുഖകരമായ യാത്ര ഉറപ്പാക്കാൻ ലെഗ് സ്പേസോട് കൂടിയ 39 റിക്ലൈനർ സീറ്റുകളാണ് ബസിലുള്ളത്. നാല് മണിക്കൂർ നീളുന്ന യാത്രയിൽ ഓരോ സീറ്റിന് പിന്നിലും എന്റർടെയ്ൻമെന്റ് സ്ക്രീനുകൾ, മിനി പാൻട്രി, മിനി റഫ്രിജറേറ്റർ, കോഫി മേക്കർ, ടോയ്‌ലറ്റ് സംവിധാനം എന്നിവയ്ക്ക് പുറമെ സൗജന്യ വൈ-ഫൈയും യു.എസ്.ബി ചാർജിങ് പോർട്ടുകളും ലഭ്യമാക്കിയിട്ടുണ്ട്. വിമാനങ്ങളിലെ ക്യാബിൻ ക്രൂവിന് സമാനമായി കെ.എസ്.ആർ.ടി.സി സ്വിഫ്റ്റ് ജീവനക്കാരിയായ ബസ് ഹോസ്റ്റസിന്റെ സേവനവും യാത്രക്കാർക്ക് ലഭിക്കും.

500 മുതൽ 600 രൂപ വരെയാണ് ഈ എക്സിക്യൂട്ടീവ് സർവീസിന്റെ ടിക്കറ്റ് നിരക്ക്. തിരുവനന്തപുരം മുതൽ എറണാകുളം വരെ 690 രൂപ നിരക്ക് വരുന്ന വന്ദേഭാരത് എക്സ്പ്രസിന്റെ അതേ സമയക്രമത്തോടടുത്താണ് ഈ ബസും സർവീസ് നടത്തുന്നത്. 9447071021 എന്ന നമ്പറിലേക്ക് വാട്‌സ്ആപ്പിൽ 'Hi' അയച്ചോ, കെ.എസ്.ആർ.ടി.സി വെബ് പോർട്ടൽ, 'എന്റെ കെ.എസ്.ആർ.ടി.സി' (Ente KSRTC) നിയോ OPRS മൊബൈൽ ആപ്പ്, റിസർവേഷൻ കൗണ്ടറുകൾ എന്നിവ വഴിയോ ടിക്കറ്റുകൾ ബുക്ക് ചെയ്യാവുന്നതാണ്. കഴിഞ്ഞ സർക്കാരിന്റെ അവസാന ഘട്ടത്തിൽ വാങ്ങിയ ഈ ബസുകൾ തുടക്കത്തിൽ ബിസിനസ് ക്ലാസ് എന്ന് നിശ്ചയിച്ചിരുന്നെങ്കിലും പിന്നീട് എക്സിക്യൂട്ടീവ് ക്ലാസ് എന്ന് പുനർനാമകരണം ചെയ്യുകയായിരുന്നു. ഇതിനൊപ്പം വാങ്ങിയ രണ്ടാമത്തെ ബസ് നിലവിൽ ആലപ്പുഴ - ബെംഗളൂരു റൂട്ടിലാണ് സർവീസ് നടത്തുന്നത്.