തിരുവനന്തപുരം: സംസ്ഥാന സർക്കാരിന്റെ അറിവോ സമ്മതമോ ഇല്ലാതെ വിഴിഞ്ഞം തുറമുഖത്തിന്റെ ഓഹരികൾ എം.എസ്.സി (MSC) കമ്പനിക്ക് കൈമാറാൻ അദാനി ഗ്രൂപ്പ് നടത്തിയ നീക്കവുമായി ബന്ധപ്പെട്ട ദുരൂഹതകൾ വർദ്ധിക്കുന്നു. വിഷയത്തിൽ അദാനി കമ്പനിയോട് സർക്കാർ അതൃപ്തി രേഖപ്പെടുത്തിയതിന് ഔദ്യോഗിക രേഖകളൊന്നും നിലവിലില്ല.
ഓഹരി കൈമാറ്റത്തെക്കുറിച്ചുള്ള വാർത്തകൾ പുറത്തുവന്നയുടൻ തന്നെ കമ്പനിയെ അതൃപ്തി അറിയിച്ചിരുന്നുവെന്നായിരുന്നു മുഖ്യമന്ത്രി നേരത്തെ വ്യക്തമാക്കിയത്. ജൂലൈ രണ്ടിന് അദാനി കമ്പനിയെ അതൃപ്തി അറിയിച്ചതായി ചൂണ്ടിക്കാട്ടി മുഖ്യമന്ത്രിയുടെ ഓഫീസിൽ നിന്ന് വാർത്താക്കുറിപ്പും നൽകിയിരുന്നു. തുടർന്ന് ജൂലൈ മൂന്നിന് അതൃപ്തി അറിയിച്ചുകൊണ്ട് നൽകിയ കത്തിന്റെ പകർപ്പ് ആവശ്യപ്പെട്ട് റിപ്പോർട്ടർ വിവരാവകാശ നിയമപ്രകാരം അപേക്ഷ നൽകിയെങ്കിലും അത്തരമൊരു കത്ത് ഇല്ലെന്ന മറുപടിയാണ് ലഭിച്ചത്.
വിവരാവകാശ രേഖയുമായി ബന്ധപ്പെട്ട വാർത്തകൾ പുറത്തുവന്നതിന് പിന്നാലെ, അതൃപ്തി വ്യക്തമാക്കിയത് രേഖാമൂലമല്ലെന്ന് വാർത്താസമ്മേളനത്തിൽ മുഖ്യമന്ത്രി വിശദീകരിച്ചു. അതേസമയം, സംഭവത്തിൽ ക്ഷമാപണം നടത്തി അദാനി കമ്പനി അയച്ച കത്തിന്റെ രേഖകൾ സർക്കാരിന്റെ പക്കലുണ്ടെന്ന് മുഖ്യമന്ത്രി ഇന്നലെ വ്യക്തമാക്കിയിരുന്നു.
