തിരുവനന്തപുരം: തുണിക്കച്ചവടത്തിന്റെ മറവിൽ വലിയ തോതിൽ എം.ഡി.എം.എ കടത്താൻ ശ്രമിച്ച നാലംഗ സംഘത്തെ നെയ്യാറ്റിൻകരയിൽ എക്സൈസ് പിടികൂടി. ഇഞ്ചക്കൽ സ്വദേശി കിരൺ, ഇയാളുടെ മാതാവ് ബീന, സുഹൃത്ത് അക്ഷയ്, കിരണിന്റെ പെൺസുഹൃത്ത് സന്ധ്യ എന്നിവരാണ് പിടിയിലായത്.
പ്രതികളിൽ നിന്ന് 125 ഗ്രാം എം.ഡി.എം.എ എക്സൈസ് സംഘം കണ്ടെടുത്തിട്ടുണ്ട്. ലഹരിക്കെതിരെയുള്ള എക്സൈസിന്റെ 'ഓപ്പറേഷൻ തണ്ടർ' ദൗത്യത്തിന്റെ ഭാഗമായി എക്സൈസ് നാർക്കോട്ടിക് സ്പെഷ്യൽ സ്ക്വാഡ് നെയ്യാറ്റിൻകര ആറാലമൂട് ജംഗ്ഷനിൽ വെച്ച് നടത്തിയ വാഹന പരിശോധനയിലാണ് സംഘം കുടുങ്ങിയത്. ബെംഗളൂരുവിൽ നിന്നാണ് സംഘം ലഹരിമരുന്ന് കടത്തിക്കൊണ്ടുവന്നതെന്ന് അധികൃതർ വ്യക്തമാക്കി.
