ആലപ്പുഴ: പുന്നമടക്കായലിൽ അരങ്ങേറുന്ന നെഹ്റു ട്രോഫി വള്ളംകളിയുടെ ഔദ്യോഗിക പോസ്റ്ററിൽ കൊടിക്കുന്നിൽ സുരേഷ് എം.പിയുടെ പേരും ചിത്രവും ഒഴിവാക്കിയത് വിവാദമാകുന്നു. ആലപ്പുഴ ജില്ലാ ഭരണകൂടം പുറത്തിറക്കിയ പോസ്റ്ററിലാണ് മാവേലിക്കര എം.പിയായ കൊടിക്കുന്നിൽ സുരേഷിനെ പൂർണ്ണമായും ഒഴിവാക്കിയത്.
വള്ളംകളിയിൽ മാറ്റുരയ്ക്കുന്ന ഭൂരിഭാഗം ചുണ്ടൻ വള്ളങ്ങളുടെയും കേന്ദ്രമായ കുട്ടനാട് കൊടിക്കുന്നിൽ സുരേഷിന്റെ മാവേലിക്കര ലോക്സഭാ മണ്ഡലത്തിലാണ് സ്ഥിതി ചെയ്യുന്നത്. മുൻപ് എൽ.ഡി.എഫ് സർക്കാരിന്റെ ഭരണകാലത്ത് തയ്യാറാക്കിയ പോസ്റ്ററുകളിൽപ്പോലും കൊടിക്കുന്നിൽ സുരേഷിന്റെ പേരും ചിത്രവും ഉൾപ്പെടുത്തിയിരുന്നു. എന്നാൽ ഇത്തവണ ഒഴിവാക്കിയ നടപടിയിൽ എം.പിക്ക് കടുത്ത അതൃപ്തിയുണ്ട്. ജില്ലാ ഭരണകൂടത്തിന്റെ ഭാഗത്തുനിന്നുണ്ടായത് ഗുരുതരമായ വീഴ്ചയാണെന്ന് കൊടിക്കുന്നിലിനെ അനുകൂലിക്കുന്നവർ ആരോപിച്ചു. ഇതിൽ പ്രതിഷേധിച്ച് വള്ളംകളി ദിനത്തിൽ നടക്കുന്ന പരിപാടികളിൽ നിന്ന് എം.പി വിട്ടുനിന്നേക്കുമെന്നാണ് വിവരം.
നേരത്തെ പ്രളയ ദുരിതാശ്വാസ പ്രവർത്തനങ്ങളുമായി ബന്ധപ്പെട്ടും കോൺഗ്രസിനുള്ളിൽ ഭിന്നത നിലനിന്നിരുന്നു. പ്രകൃതിദുരന്തം ബാധിച്ച കുട്ടനാട്ടിലേക്ക് എ.ഐ.സി.സി ജനറൽ സെക്രട്ടറി കെ.സി. വേണുഗോപാലും മന്ത്രിമാരും നടത്തിയ സന്ദർശനത്തിൽ പങ്കെടുക്കാതിരുന്ന കൊടിക്കുന്നിൽ സുരേഷ്, പിന്നീട് ഒറ്റയ്ക്കാണ് പ്രദേശം സന്ദർശിച്ചത്. അതേസമയം, 72-ാമത് നെഹ്റു ട്രോഫി വള്ളംകളി ശനിയാഴ്ച നടക്കും. വീയപുരം ജലരാജാവാണ് നിലവിലെ ജേതാക്കൾ.
