വയനാട്: സുൽത്താൻ ബത്തേരി എന്ന സ്ഥലനാമം മാറ്റി 'ഗണപതിവട്ടം' എന്നാക്കണമെന്ന ആവശ്യവുമായി ഹിന്ദു ഐക്യവേദി സംസ്ഥാന അധ്യക്ഷൻ ആർ.വി. ബാബു രംഗത്ത്. മതേതരത്വത്തിന്റെ പേരുപറഞ്ഞ് 'ഗണപതിവട്ടം' എന്ന ചരിത്രപരമായ നാമം ബോധപൂർവ്വം തമസ്കരിക്കപ്പെടുകയാണുണ്ടായതെന്ന് അദ്ദേഹം വിമർശിച്ചു. മുൻപ് ഔദ്യോഗിക സർക്കാർ രേഖകളിൽപ്പോലും ഗണപതിവട്ടം എന്നാണ് രേഖപ്പെടുത്തിയിരുന്നതെന്നും അദ്ദേഹം ചൂണ്ടിക്കാട്ടി. സുൽത്താൻ ബത്തേരി എന്ന പേര് തുടരുന്നത് നാടിന്റെ സാംസ്കാരിക പൈതൃകത്തെ പൂർണ്ണമായി നിഷേധിക്കുന്നതിന് തുല്യമാണെന്നും, യഥാർത്ഥ പേര് പുനഃസ്ഥാപിക്കണമെന്ന് ആവശ്യപ്പെട്ട് സർക്കാരിനെ സമീപിക്കുമെന്നും ഇതിനായി ഹിന്ദു ഐക്യവേദി ശക്തമായ പ്രക്ഷോഭം സംഘടിപ്പിക്കുമെന്നും അദ്ദേഹം വ്യക്തമാക്കി.
2024-ലെ ലോക്സഭാ തെരഞ്ഞെടുപ്പ് കാലയളവിൽ അന്നത്തെ ബി.ജെ.പി സംസ്ഥാന അധ്യക്ഷൻ കെ. സുരേന്ദ്രനും സമാനമായ ആവശ്യം ഉന്നയിച്ചത് വലിയ രാഷ്ട്രീയ വിവാദങ്ങൾക്ക് വഴിവെച്ചിരുന്നു. സുൽത്താൻ ബത്തേരിയുടെ യഥാർത്ഥ നാമം ഗണപതിവട്ടം എന്നാണെന്നും, ടിപ്പു സുൽത്താന്റെ അധിനിവേശത്തിന് പിന്നാലെ ബ്രിട്ടീഷുകാരാണ് ഈ പേര് മാറ്റിയതെന്നുമായിരുന്നു അദ്ദേഹത്തിന്റെ വാദം. സുൽത്താന്റെ വെടിക്കോപ്പ് ശാല എന്ന അർത്ഥത്തിലുള്ള 'സുൽത്താൻ ബാറ്ററി' പിൽക്കാലത്ത് സുൽത്താൻ ബത്തേരിയായി മാറുകയാണുണ്ടായത്. താൻ എം.പിയായി തെരഞ്ഞെടുക്കപ്പെട്ടാൽ പ്രധാനമന്ത്രി നരേന്ദ്ര മോദിയുടെ സഹായത്തോടെ സ്ഥലത്തിന്റെ പേര് ഗണപതിവട്ടം എന്ന് മാറ്റുന്നതിനായിരിക്കും പ്രഥമ പരിഗണനയെന്നും, 1984-ൽ പ്രമോദ് മഹാജൻ വയനാട് സന്ദർശിച്ച വേളയിൽത്തന്നെ താൻ ഇക്കാര്യം ഉന്നയിച്ചിരുന്നതായും സുരേന്ദ്രൻ അഭിമുഖത്തിൽ വ്യക്തമാക്കിയിരുന്നു. മലയാളികളെ ആക്രമിക്കുകയും ഹൈന്ദവരെ മതപരിവർത്തനത്തിന് ഇരയാക്കുകയും ചെയ്ത ടിപ്പു സുൽത്താന്റെ പേരിലുള്ള നാമം നിലനിർത്തേണ്ട യാതൊരു ആവശ്യവുമില്ലെന്നും സുരേന്ദ്രൻ അന്ന് പറഞ്ഞിരുന്നു.
